د کابل طبي علومو پوهنتون د مالي او اداري چارو مرستیال په مشرۍ د چارو د ښه والي او لاښې همغږۍ په موخه ناسته تر سره شوه
نن دوشنبه د روان کال زمري میاشتې پر لومړۍ نېټه د مالي او اداري چارو مرستیال مولوي عبد الرحمن مرحوم په مشرۍ د پوهنتون او اړوندو تدريسي روغتونونو د مالي او اداري آمریتونو او مدیریتونو سره د یو لړ مهمو موضوعاتو په اړه ناسته وشوه.
دغه غونډه د قران عظیم الشان د څو مبارکو آیتونو په تلاوت سره پیل شوه چې په سر کې مالي او اداري مرستیال محترم مولوي عبد الرحمن مرحوم صاحب د پوهنتون او اړوندو روغتونونو مالي او اداري کارمندانو ته د خپلو چارو په ښه تر سره کولو، په جماعت سره د لمانځه اداء کولو، د دعوت او ارشاد په دیني او اصلاحي درسونو کې د ګډون، په پوهنتون او ځانګړي ډول روغتونونو کې د نظافت او پاکوالي، د کارمندانو له لوري د چارو د نیمګړتیاوو پوره کولو د هدایتونو عملي کولو، هره میاشت معاونیت ته د خپل مالي او اداري راپور لېږلو او یو شمېر نورو مهمو موضوعاتو په اړه سپارښتنې او ټينګار وشو.
همدا رنګه د مالي او اداري چارو مرستیال د هرې برخې مسوولین په خپلو چارو کې مکلف او مسوول و ګڼل او زیاته یې کړه چې په ښه ډول د چارو عملي کولو سره الله (ج) مسوول شخص ته په دنیا او آخرت کې اجر او ثواب نصیب کوي. مالي او اداري مرستیال وویل د روغتونونو ستونزې باید په رسمي ډول له پوهنتون سره شریکې او د حل لپاره یې پر وخت اقدامات تر سره شي.
په پای کې د ګډونوالو لخوا خپل نظرونه وړاندې او په اړه یې لازمې پرېکړې تر سره شوې.
