د دیني درسونو غوره کارمندانو ستاینه وشوه
د دعوت او ارشاد آمریت دیني درسونو په آزموینه کې د کابل طبي علومو پوهنتون اداري کارمندانو د ستاینې په مناسبت محفل د لوړو زده کړو وزارت د دعوت او ارشاد رئیس شیخ شاکر الله وحدت په ګډون تر سره شو او د اداري او خدماتي کارمندانو چې لومړی، دویم او درېیم مقام یې تر لاسه کړی و د جایزو په ورکولویې ستاینه وشوه.
د لوړو زده کړو وزارت د دعوت او ارشاد رئیس د دیني احکامو او الهي لارښوونو وړاندې کولو په برخه کې د دعوت او ارشاد مسوولینو له هڅو خوښي څرګنده کړه او ویې ویل پر هر مسلمان لازمه ده چې د الهي احکامو او ارشاداتو په اړه پوهه ولري او د خپلو عملونو، عقایدو او اخلاقو د اصلاح په خاطر د دیني علومو زده کړه د هر مسلمان اړتیا ده.
همدا راز د پوهنتون مالي او اداري چارو مرستیال مولوي عبدالرحمن مرحوم د دیني علومو د ارزښت او اهمیت په اړه خبرې وکړې او ویې ویل چې د دیني علومو زده کړه د مسلمانانو د آخرت اړتیا ده.
د یادولو وړ ده چې د دعوت او ارشاد آمریت د پوهنتون کارمندانو لپاره دوامدار اصلاحي بیانونه او دیني احکام تدریس کوي چې کارمندان ترې ډېره خوښي څرګندوي.
