د طبي انجنیري فارغ ورکونکي ډيپارټمنټ د یو لړ شانداره مراسمو په ترڅ کې افتتاح او انکوباتور ماشین نندارې ته وړاندې شو
د کابل طبي علومو پوهنتون د مسلکي کادرونو د زده کړو او روزنې همدا راز په روغتیایي سکټور کې د طبي وسایلو د نصب، د کارونې څرنګوالي، ترمیم، مراقبت او ساتنې په موخه د هېواد او ټولنې د اړتیاوو پوره کولو لپاره د طبي تجهیزاتو د ترمیم او ټکنالوژۍکمیونيټي کالج د تکمیلي روغتیایي علومو پوهنځي په چوکاټ کې د فارغ ورکوونکي ډيپارټمنټ ( لېسانس دورې) ته ارتقا، او له وخت مخکې زېږېدلیو ماشومانو د ساتنې ماشین ( انکو باتور ) چې د همدې ډیپارټمنټ لخوا جوړ شوی د لوړو زده کړو وزارت علمي مرستیال دوکتور لطف الله خیر خواه له لوري افتتاح او یاد ماشین نندارې ته وړاندې شو
د پرانيستې په مراسمو کې د کابل طبي علومو پوهنتون رئيس پوهنیار دوکتور فضل الرحمن رحماني د طبي انجنیرۍ مخینې ته په اشارې دغه څانګه د پوهنتون او ټولنې لپاره مهمه اړتیا وبلله ویې ویل «د طبابت په اوسني عصر کې طبي انجنیري یوه مهمه څانګه ده، دغه څانګې د طبابت اساسات آسانه کړي » پوهنیار رحماني زیاته کړه چې په نورو هېوادونو کې د طبابت د پرمختګ لامل طبي انجنیري ده او افغانستان چې په طبي برخه کې له ستونزو سره مخ دی د نورو ستونزو تر څنګ د طبي انجنیري څانګې نشتون دی.
د کابل طبي علومو پوهنتون رئیس د خپلو خبرو په دوام وویل د طبابت په برخه کې د طبي انجنیري د اهمیت او اړتیا همدا رنګه د دغه څانګې د حقوقي دریځ تر لاسه کولو لپاره، فارغ ورکوونکي ډیپارټمنټ ( لېسانس دورې ) ته ارتقا وکړه او د کانکور آزموینې له لارې به محصلین ورته جذب شي.
د لوړو زده کړو وزارت علمي معین د طبي انجنیري ډيپارټمنټ له ارتقا څخه خوښي څرګنده کړه او ویې ویل چې د لوړو زده کړو وزارت په تحصیلي بنسټونو کې د هر ډول علمي پرمختګ ملاتړ کوي، او پدې برخه کې هر ډول مرستې ته ژمن دی او د وزارت موخې د هېواد تحصیلي پراختیا او پرمختیا ده.
علمي معین زیاته کړه په دې وروستیو کې د لوړو زده کړو وزارت په تحصیلي بنسټونو کې ۱۵ د ماسټرۍ، ۲۰ ډيپارټمنټونه او ۲ د دوکتورا پروګرامونه رامنځ ته کړي دي.
د مراسمو په لړ کې د طبي انجنیري ډيپارټمنټ د استادانو لخوا جوړ شوی پرزېنټېشن د دغه ډيپارټمنټ د ارزښت، اړتیا، لاسته راوړنو، امکاناتو، راتلونکو پروګرامونو، ستونزو او د هغه د حل لارو په اړه وړاندې شو.
د یادولو وړ ده چې دغه څانګه د مسلکي ځواک په روزنه، د څېړنې او نوښټ، ډيزاین او مختلفو ماشینونو د جوړولو او دوه اړخیزو همکاریو په برخه کې د ټولنې اړتیاوې پوره کوي. همدا شان دغه ډيپارټمنټ په تېرو کلونو کې د نوښت او خلاقیت په برخه کې د مسلکي کادرونو د تدریس تر څنګ توانېدلی چې وسایل او طبي ماشینونه ( ونتلاتور یا مصنوعي تنفس ماشین ، د آکسیجن ماشین، سکشن، سنتر فیوز، نیبولایزر، شیکر ماشین او واتر بات ماشین) په لږ لګښت ډيزاين او جوړ کړي.
