د تضمین کیفیت د علمي برنامو چوکاټ درې ورځنی سیمینار پیل شو
د لوړو زده کړو وزارت د تضمین کیفیت او اعتبار ورکولو ریاست له لوري د کابل طبي علومو پوهنتون رهبري هیئت، استادانو او کارمندانو ته د اعتبار ورکولو سند د ساتلو په اړه د پوهاوي او معلوماتو تر لاسه کولو په موخه درې ورځنی روزنیز سیمینار پیل شو.
په پیل کې د کابل طبي علومو پوهنتون سر پرست رئیس دوکتور مفتي اسد الله نجات د لوړو زده کړو وزارت له لوري د دغه سیمینار له جوړېدو څخه د خوښۍ په څرګندولو سره د تضمین کیفیت معیارونو مراعات کول د ادارې د پراختیا او ودې لامل وبلل او ټینګار یې وکړ چې موخې ته د رسېدو لپاره د تضمین کیفیت چوکاټ او اصول باید په پام کې ولرو.
د لوړو زده کړو وزارت د تضمین کیفیت او اعتبار ورکولو ریاست رئیس استاد شاکر وحیدي د دغه سیمینار موخې معرفي کړې او ویې ویل: د لوړو زده کړو وزارت ژمن دی چې په ټولو تحصیلي بنسټونو کې د تحصیلي کچې د لوړوالي په پار د تضمین کیفیت علمي پروګرامونه او روزنیز سیمینارونه وړاندې کړي.
وروسته بیا پوهنمل محمد امین امین او پوهنمل محمد امین نیازي د تضمین کیفیت د معیارونو چوکاټ او جوړښت خلاصه وړاندې کړه او د سند ساتلو او اعتبار ورکولو ۱۱ معیارونو څخه یې د پوهنتون په کچه تر ۶ معیار پورې ګډونوالو ته تشرېح کړل.
ټاکل شوې په دغه سیمینار کې د لوړو زده کړو وزارت د تضمین کیفیت او اعتبار ورکولو بورډ غړي د تضمین کیفیت معیارونو او سند ساتلو په اړه د پوهنتون، پوهنځیو او ډيپارټمنټونو په کچه معلومات وړاندې کړي.
