کابل طبي علومو پوهنتون د شیخ زاید پوهنتون له تدریسي روغتون سره د طبي وسایلو په فعالولو کې مرسته وکړه
د کابل طبي علومو پوهنتون د طبي انجنیري ډيپارټمنټ ۴ تنه استادانو چې د شیخ زاید پوهنتون اړوند تدریسي روغتون د طبي وسایلو او تجهیزاتو د فعالولو په برخه کې د همکارۍ په موخه خوست ولایت ته سفر کړی و د یاد روغتون ۱۳ پايې طبي وسایل چې له کاره لوېدلي و، بیا ترمیم او فعال کړل.
په دغه وسایلو کې د DR, X-ray، وینټلاتور، انستیزیا، انفنټ آنکوباتور، انفنټ وارمر،Patient Monitor او نیبولایزر ماشینونه شامل و چې تر فعالېدو وروسته د کابل طبي علومو پوهنتون د طبي انجنیري ډيپارټمنټ استادانو لخوا هغه کارمندانو ته چې یاد وسایل يې کارول لازمه روزنه ورکړل شوه.
همدا رنګه ۱۲ پایې نور طبي ماشینونه چې د استادانو لخوا یې تخنیکي ستونزې په ګوته شوې چې د پرزه جاتو له تهیه کولو وروسته به فعال شي.
د یادونې وړ ده چې یاده همکاري د خوست ولایت د شیخ زاید پوهنتون په غوښتنې او د کابل طبي علومو پوهنتون رهبري د لارښوونې پر اساس تر سره شوې ده.
