کابل طبي علومو پوهنتون «ابوعلي ابن سينا» په ځانګړو مراسمو کې د ۱۴۰۵
کابل طبي علومو پوهنتون «ابوعلي ابن سينا» په ځانګړو مراسمو کې د ۱۴۰۵ کال د طبي شورا د (Exit Exam) ازموینې له بریالیو فارغانو او همدارنګه هغو محصلانو څخه چې د امیرالمؤمنین حفظهالله د فرمانونو په رقابتي ازموینه کې یې لوړې نمرې ترلاسه کړې وې، د ستاینلیکونو او ډالیو په ورکولو سره وستایل.
د یاد مراسمو د ویناوالو په برخه کې، د لوړو زده کړو وزارت د محصلانو د خدمتونو د انسجام رئیس، د کابل طبي علومو پوهنتون سرپرست او د کابل پولیتخنیک پوهنتون د محصلانو چارو مرستیال د علم پر اهمیت، د هېواد په پرمختګ کې د محصلانو پر ونډې او د بااستعداده ځوانانو څخه د لوړو زده کړو وزارت پر ملاتړ خبرې وکړې. هغوی د محصلانو او فارغانو بریاوې د هېواد د تحصیلي نظام لپاره د ویاړ سبب وباله او له نورو محصلانو یې هم وغوښتل چې په زیار او هڅو سره په علمي او مسلکي ډګرونو کې لا ډېرې لاسته راوړنې ولري.
د مراسمو په پای کې، له مخکښو محصلانو او فارغانو څخه د ځانګړو ستاینلیکونو او ډالیو په وېشلو سره په رسمي ډول قدرداني وشوه.
