په کابل طبي علومو پوهنتون کې د مغز، اعصابو او ملاتیر جراحي لومړنۍ سمپوزیم جوړ شو
د کابل طبي علومو پوهنتون او د افغانستان اعصابو جراحانو ټولنې له لوري د مغز، اعصابو او ملا تیر د جراحي لومړنی سمپوزیم د اعصابو جراحي متخصصانو د علمي ودې، ظرفیت لوړونې، د وروستیو علمي لاسته راوړنو د وړاندې کولو او د مغز او اعصابو په علومو کې له نویو لارو چارو سره د بلدتیا په موخه ترسره شو.
په دغه سمپوزیم کې د کابل طبي علومو پوهنتون رهبري هيئت. داخلي او بهرنیو ډاکټرانو او بېلابېلو ولایتونو د اعصابو جراحي برخې ډاکټرانو په حضوري او آنلاین ډول ګډون کړی و.
د یاد پروګرام په پیل کې د کابل طبي علومو پوهنتون رئیس دوکتور مفتي اسد الله نجات د یاد سمپوزیم له ټولو مسوولینو څخه د مننې تر څنګ د علمي کادرونو او متخصصانو د پرمختګ او تجربو شریکولو لپاره دغه ډول پروګرامونه مهم او ګټور وبلل.
همدارنګه د پوهنتون رئيس وویل چې د نویو لارو چارو او تکنالوژۍ سره د اعصابو جراحي برخې ډاکټرانو د بلدتیا او پرمختګ لپاره اړتیا ده چې دا ډول پروګرامونه لا ډېر جوړ شي تر څو هېواد د اعصابو جراحي په برخه کې پر ځان بسیا شي او بهر ته د ناروغانو له تللو مخنیوی وشي.
په دغه سمپوزیم کې د علي آباد تدریسي روغتون د اعصابو جراحي ډيپارټمنټ استاد پوهاند ډاکټر احمد فواد پيرزاد د اعصابو جراحي ډيپارټمنټ د مخینې په اړه خبرې وکړې، همدا رنګه د یاد ډيپارټمنټ کړنې او لاسته راوړنې یې هم شریکې کړې.
د یادولو وړ ده چې د علي آباد تدریسي روغتون، ولایتونو د روغتونونو د اعصابو جراحي ډاکټرانو او بهرنیو پروفیسورانو د مغز، اعصابو او ملا تیر د جراحي په اړه خپلې وروستۍ څېړنې وړاندې کړې.
