د کابل طبي علومو پوهنتون نظارتي هیئت په علي آباد تدریسي روغتون کې د صحي خدمات وړاندې کولو له بهیر څخه لیدنه وکړه
پرون شنبه د ۱۴۴۴ هـ ق کال د شوال المکرم پر ۱۶ نېټه د کابل طبي علومو پوهنتون نظارتی هیئت د مالي او اداري مرستیال مولوي عبدالرحمان مرحوم په مشرۍ د صحي خدماتو وړاندې کولو له بهیر څخه د لیدنې ترڅنګ، د داخلې له ۲۰۰ بیستریز تعمیر سربېره د روغتون اړوند له نورو څانګو څخه لیدنه وکړه.
د علی آباد تدريسي روغتون رئیس ډاکټر عبدالمطلب شینواري د یاد روغتون د امکاناتو او آسانتیاوو په اړه معلومات وړاندې کړل او ویې ویل: دغه روغتون زیاتو مجهزو طبي وسایلو او متخصصو ډاکټرانو ته اړتیا لري، تر څو هېوادوالو ته زیات روغتایي خدمات وړاندې کړي، هغه زیاته کړه چې اوس مهال دغه روغتون د سرطاني ناروغیو د تشخیص مجهز لابراتوار، د پتالوژي څانګه، د انکولوژي داخله څانګه، مجهزه عملیات خونه او فارمسي لري او د داخلې په ۲۰۰ بستریز برخه کې، عمومي داخله، د جدي مراقبت او ایکسرې څانګې فعالې دي او روغتیایي خدمات وړاندې کوي.
د علي آباد تدريسي روغتون رئیس او مسلکي پرسونل لخوا په یاد روغتون کې د ځینو ستونزو او نیمګړتیاوو یادونه وشوه چې د نظارتي هیئت له لوري واورېدل شوې او د همکارۍ ژمنه وشوه .
د یادولو وړ ده، چې د علي آباد په تدریسي روغتون کې چې ۹۰ کلنه مخینه لري د اسلامي امارت په راتلو سره د اداري او روغتیایي خدماتو په برخه کې زیات او مثبت بدلونونه راغلي دي .
