د کابل طبي علومو پوهنتون «ابو علي ابن سینا» اړوند علي آباد تدریسي روغتون د بطني جراحي او بطني آنکولوژي ډيپارټمنټ ډاکټرانو د یو ۳۵ کلن ناروغ د کيڼ ادرنال (Left Adrenalectomy) غدې تومور لرې کولو جراحي عملیات په بریالیتوب ترسره کړ.
د دغه ډيپارټمنټ غړی پوهنیار ډاکټر احمد عمر امیري وایي چې ناروغ له دوه کلونو را هیسې د کيڼ اړخ درد، د زړه ټوپ وهلو، زیات خولې کېدلو او سردرد څخه شکایت درلود. له بشپړ معایناتو او لازمو ارزونو وروسته د ناروغ د کيڼ ادرنال (Left Adrenal PheoChromoCytoma) په غده کې د (۸×۷×۵) سانتي مترو په اوږدوالي تومور تشخیص شو او د دغه ډول تومور وظیفوي ماهیت او رامنځته کېدونکو خطرونو ته په کتو سره یې د جراحي عملیات ترسره کېدو پرېکړه وشوه چې تر عملیات وروسته د پتالوژي ډيپارټمنټ له لوري د کتل شوې نمونې راپور هم د (Benign Pheochromocytoma) تومور تایید کړ.
د یادولو وړ ده چې له عملیات وروسته د ناروغ وضعیت د ډاډ وړ بلل شوی او له څلور ورځې بستر وروسته د نورمال روغتیايي حالت په لرلو سره له روغتون څخه رخصت شو.
