نرسنګ پوهنځي «داستادانو علمي – څېړنیزو موضوعاتو پایلې» علمي کنفرانس ترسره شو
د کابل طبي علومو پوهنتون«ابوعلي ابن سینا» د نرسنګ پوهنځي د استادانو لخوا د علمي - څېړنیزو موضوعاتو پایلې تر عنوان لاندې علمي کنفرانس ترسره شو. دغه کنفرانس د کابل طبي علومو پوهنتون د علمي کنفرانسونو په نمبر (۱) تالار کې وړاندې شو.
په پیل کې د کابل طبي علومو پوهنتون د محصلانو چارو مرستیال استاد عطاءالله فیضي د دغه کنفرانس له جوړېدو څخه په مننې وویل چې دا ډول کنفرانسونه په علمي ډګر کې مهم دي او له استادانو یې وغوښتل چې له سیمینارونو او کنفرانسونو سره د محصلانو د آشنا کېدو لپاره باید په تدریجي ډول محصلانو ته هم موضوعات ورکړل شي چې سیمینارونه ورباندې ترتیب او اریه کړی، څو د مونو ګراف او تېزېس لیکلو پر مهال له ستنزو سره مخ نه شي.
د طبي زده کړو پراختیا ریاست د ماسټرۍ پروګرام آمر پوهنیار شاه جهان شایان د علمي - څېړنیزو موضوعاتو د اهمیت په اړه خپل پرزينټيشن وړاندې کړ او ویې ویل چې په ټوله نړۍ کې د پوهانو او استادانو لخوا علمي او څېړنیز موضوعات په ژورنالونو کې خپرېږي او داموضوعات د علمې کچې د لوړوالي لامل کېدای شي او دا موضوعات به په علمي کچه مثبتې پایلې هم ولري.
وروسته بیا پوهنمل فریدون فرهمند د "دوایي تېروتنو" تر عنوان لاندې خپل سیمینار وړاندې کړ او ويې ویل چې د درمل ورکولو په وخت کې تېروتنه نه یوازې د نورو ناروغیو بلکه د اقتصادي او نورو ستونزو لامل هم کیدای شي، نوموړي په روغتونونو کې د درملو ورکولو په وخت کې د تېروتنو عوامل په دنده کې غفلت، په مخففاتو نه پوهېدل، د درمل ورکولو مهارت نه درلودل، د درملو کیفیت خرابوالی، په نسخه نه پوهېدل او داسې نور وښودل. همدا راز نوموړي وویل چې د دغه ډول تېروتنو د مخنیوي لپاره باید له نرسانو نظارت وشي او د نړیوالو معیارونو سره د روغتیایي خدمات برابري وړاندې شي ترڅو د داسې شانته ستونزو د رامنځته کېدو مخنیوی وشي.
په پای کې پوهندوی ذاکر حسین حسینپور په میوند تدریسي روغتون کې د ماشومانو د شري ناروغیو په اړه خپل د ترسره شوې څېړنې پایلې پرزېنټېشن وړاندې کړ او ویې ویل چې د سرخکانو ناروغۍ انتقال لامل د موبیلا په نوم ویروس دی چې د هوا او تماس له لارې انتقالېږي، د سرخکانو ناروغۍ د مخنیوي لپاره باید حفظ الصحه په پام کې ونيول شي او ماشومانو ته د سرخاکانو واکسین ورکړل شي.
په کابل طبي علومو پوهنتون کې استادان تحقیقات کوي او د خپلو تحقیقاتو پایلې د ژورنالونو یا علمي کنفرانسونو له لارې له نورو سره شریکوي تر څو ډاکتر او ان عام خلک د ناروغیو په عواملو پوه شي او وقایعه یې وکړي.
