کابل طبي علومو پوهنتون د ځانګړو مراسمو په ترڅ کې خپل ممتاز محصلان وستايل.
کابل طبي علومو پوهنتون لسګونه هغه محصلان چې په بېلابېلو؛ لکه تحصیلي، علمي او سپورتي څانګو کې یې لوړ مقامونه ترلاسه کړي و، د لوړو زده کړو وزارت او کابل طبي علومو پوهنتون رهبري او یو شمېر استادانو په شتون کې د ستاينليکونو او ډالیو په ورکړې سره وستایل.
په پیل کې د کابل طبي علومو پوهنتون رئیس دوکتور مفتي اسدالله نجات ټولو ګډونوالو ته ښه راغلاست ووایه او د طب علم په اړه يې خبرې وکړې. نوموړي محصلان تشويق او دوی ته په خطاب کې يې وويل: طبابت ډېر ارزښتمن او پراخ علم دی، اړينه ده چې خپلو زده کړو ته د ماسټرۍ او دوکتورا تر کچې دوام ور کړئ؛ تر څو په ملي او نړیواله کچه روزل شوي ډاکټران و اوسئ.
د پروګرام په دوام د لوړ زده کړو وزارت د محصلانو د همغږۍ او انسجام رئيس، د نظارت او ارزيابي رئيس، د پوهنتون د محصلانو چارو مرستیال، علمي مرستيال او د دعوت او ارشاد آمر ويناوي وکړې او هر يوه په خپل وار سره محصلان تشويق او آينده کې يې ورته د لا بريا غوښتنه وکړه.
د یادونې وړ ده چې د غونډې په پای کې د پوهنتون رهبري له لوري ممتازو محصلانو ته ستاينليکونه او ډالۍ ورکړل شوې.
