په ۱۴۰۳ هـ.ش کال کې کابل طبي علومو پوهنتون د ۷۶ څېړنیزو نړیوالو او ۲۹ داخلي مقالو په خپرولو سره د هېواد د علمي څېړنیزې کچې لوړولو په موخه کوټلي ګامونه اخیستي.
دغه لاسته راوړنه د پوهنتون د استادانو، ډاکترانو او عملي کادر غړیو د هڅو پایله ده چې د دغه بنسټ د رهبرۍ په ملتیا، په ځانګړې ډول د علمي څېړنو کمېټې لخوا د طبی څېړنو د ودې په موخه اړین امکانات برابر شوي. د دغې کمېټې د جلساتو په ترڅ کې د علمي کادر غړیو د علمي آثارو او مقالو په منظم ډول کتنه او ارزونه کېږي څو یې کیفیت او صحت تضمین شي.
همداراز، د «افغان طبي مجلې» تر عنوان لاندې د کابل طبي علومو پوهنتون علمي فصل نامه چې له ۱۳۳۵ هـ.ش کال را په دې خوا خپرېږي، د ډاکترانو د علمي کچې په لوړولو او د طبي څېړنو په خپرېدو کې مهمه ونډه لري.
دغه لاسته راوړنه د طبي زده کړو د کیفیت لوړونې او څېړنو په برخه کې د کابل طبي علومو پوهنتون د ژمنتیا نښه ده او د هېواد د علمي ودې او روغتیایي خدمتونو په ښه کېدو کې موثر ګام دی.
