هر کال په هېواد کې نیم میلیون تنه د سترګو ناروغیو له امله ړانده کېږي
د لید نړیواله ورځ چې د اکتوبر په ۱۲هر کال د نړۍ په ټولو هېوادونو کې لمانځل کېږي نن پنجشنبه د روان کال د تلې میاشتې پر ۲۰ د کابل طبي علومو پوهنتون «ابو علي ابن سینا» اړوند په سترګو روغتون کې د کابل طبي علومو پوهنتون رئیس دوکتور مفتی اسدالله نجات، د نور روغتون رئیس ډاکتر ظاهرګل ځدړان او یو شمېر نورو مشرانو هم حضور درلود، د یو لړ شانداره مراسمو په ترڅ کې ولمانځل شوه.
د سترګو تدریسي روغتون رئيس ډاکټر محمد بشیر عثماني د غونډې ګډونوالو او مېلمنو ته د ښه راغلاست تر څنګ په خپلو خبرو کې وویل چې په هېواد کې د بېلابېلو ناروغیو له امله هر کال ۵۰۰ زره کسان خپل لید له لاسه ورکوي، چې دغه ناروغۍ زیاتره د درملنې وړ دي نوموړي له ټولو هېواد والو وغوښتل چې هر وخت په ځانګري ډول د کار په وخت کې له خپلو سترګو ساتنه وکړي.
وروسته بیا د کابل طبي علومو پوهنتون رئيس دوکتور مفتي اسدالله نجات د سترګو د ارزښټ په اړه خبرې وکړې او ویې ویل چې سترګې د الله(ج) لوی نعمت دي، په فزیکي او معنوي لحاظ باید د هغه ساتنه وکړو، نوموړي همدا راز د اسلامي نړۍ لومړني طبیب ابو علي ابن سینا د کتاب چې د ارسطو د لارښوونو څخه یې نقل کړی دی یادونه وکړه چې ویلي یې دي خپلې سترګې له ګرد او غبار، دود او نورو مضرو شیانو وساتئ.
د غونډې په دوام کې د نور روغتون رئيس ډاکټر ظاهر ګل ځدران د دغه پروګرام له جوړېدو څخه خوښي څرګنده کړه او ویې ویل چې د داسې پروګرامونو موخه خلکو ته د سترګو ناروغیو په اړه پوهاوی او په ګډه د سترګو په برخه کې هېواد والو ته د خدمت تر سره کول دي.
همداراز بیا د سترګو ډيپارټمنټ شف پوهنمل دوکتور محمد نعیم حمید د سترګو ناروغیو د لاملونو او درملنې په اړه خبرې وکړې او ویې ویل چې سترګې د انسان په بدن کې مهمه برخه ده او د سترګو له امله د انسان د مغز ۹۰ سلنه فعالیتونه تر سره کېږي نو باید له خپلو سترګو څخه سمه ساتنه وکړو او د سترګو ستونزو سره د مخامخ کېدو پر وخت یې ژر تر ژره درملنه وکړو.
په پای کې پوهنوال شېر محمد امیر زاده د سترګو روغتون د مخینې په اړه هر اړخیز معلومات وړاندې کړل.
