د کادري روغتونونو د (تخصصي دورې) ټریني ډاکټرانو ارتقایي آزموینه واخیستل شوه
د لمړي ځل لپاره د ۲۵۶ تنه ټریني ډاکټرانو آزموینه چې د کابل طبي علومو پوهنتون اړوند مختلفو روغتونونوکې د تخصص دوره تر سره کوي، نن چهارشنبه د روان کال د کب پر ۱۶ چې د طبي زده کړو پراختیا ریاست له لوري په لار اچول شوې وه واخیستل شوه.
د طبي زده کړو پراختیا رئيس پوهنوال دوکتور محمد ولي ناصري وایي چې دغه ډول آزموینې هر کال د مسلکي ډاکټرانو ظرفیت د ارزونې په موخه تر سره کېږي. نوموړي زیاته کړه چې دغه آزموینه پخوا د روغتونونو د اړوندو ډيپارټمنټونو لخوا اخیستل کېده چې د کابل طبي علومو پوهنتون په نوښت او علمي شورا له پرېکړې وروسته د ټریني ډاکټرانو ارتقایي آزموینه په پوهنتون کې اخیستل کېږي.
له بلې خوا هغه ټرېني ډاکټرانو چې په دغه آزموینه کې ګډون کړی و له دغه پروسې څخه خوښي څرګنده کړه.
د یادولو وړ ده چې د تخصص بشپړولو برنامه چې د دولتي او خصوصي پوهنتونونو د طب او ستوماتولوژي پوهنځیو فارغان چې د آزموینو ملي ادارې له لارې د ځانګړې آزموینې له تر سره کولو وروسته، د دغه پوهنتون اړوند کادري روغتونونو په مختلفو دسپلینونو کې جذب او له درې تر پینځه کلونو پورې په عملي او نظري ډول د استادانو تر نظارت لاندې زده کړې تر لاسه کوي.
