د کابل طبي علومو پوهنتون رئیس شیخ الحدیث مفتي احسان الله ابوالفیضان د مالي او اداري چارو مرستیال مولوي عبدالرحمن مرحوم په ملتیا د ستوماتولوژي تدریسي روغتون له مسؤولینو سره د ناستې تر څنګ د دغه روغتون له بېلابېلو برخو څخه لیدنه وکړه.
په پیل کې د ستوماتولوژي تدریسي روغتون رئیس ډاکټر محمد طاهر خلیل زي د پوهنتون رئيس او ورغلي پلاوي ته ښه راغلاست ووایه او د روغتون د لاسته راوړنو، فعالیتونو او راتلوونکو پلانونو په اړه يې معلومات وړاندې کړل. نوموړي د روغتون د روغتیایي خدماتو او ماهرو کادرونو روزنې ته په اشارې څرګنده کړه چې د ستوماتولوژي تدریسي روغتون په هېواد کې د روغتیایی وضعیت ښه والي او غاښونو د طب څانګې د علمي ودې په برخه کې مهمه ونډه لري.
وروسته بیا د پوهنتون رئیس د روغتون له کارمندانو سره لیدنه وکړه او د شرعي مسوولیتونو او ورسپارل شویو دندو د ښه ترسره کولو اهمیت یې بیان کړ او ټینګار یې وکړ چې هر کس په ورسپارل شویو دندو کې ځانته مسول دی چې په سمه توګه د دندې په ترسره کولو سره به د الله تعالی له لورې د معنوي بدلې ترلاسه کېدو لامل شي. نوموړي زیاته کړه چې د روغتون پر کارمندانو الله تعالی لویه پېرزوینه کړې ده چې دوی ته یې د غاښونو طب په برخه کې لوړ مقام ورکړی؛ ترڅو د ځوانو کادرونو د روزنې ترڅنګ هېوادوالو ته د روغتیایي خدماتو په ترسره کولو کې هم مهمه ونډه واخلي.
په پای کې د کابل طبي علومو پوهنتون رئیس ډاډ ورکړ چې د یاد روغتون د لومړنیو اړتیاوو له منځه وړلو او امکاناتو په ښه والي کې به لازم اقدامات ترسره کړي.
