د کابل طبي علومو پوهنتون رئيس د قطر سرې میاشتې ټولنې له استازي سره لیدنه وکړه
د کابل طبي علومو پوهنتون رئیس دوکتور مفتي اسد الله نجات د قطر سرې میاشتې ټولنې له استازي احمد العثماني او مل پلاوي سره په خپل کاري دفتر کې په داسې حال کې چې د دغه پوهنتون د روغتیایي مؤسسو چارو مرستیال دوکتور محمد هاشم ځاځي او د طبي زده کړو پراختیا رئیس پوهنوال دوکتور محمد ولي ناصري هم حضور درلود، ليدنه وکړه او د دوه اړخیزو همکاریو په چوکاټ کې یې پر بېلابېلو مهمو موضوعاتو بحث او خبرې وکړې.
دوکتور مفتي اسدالله نجات د قطر هېواد سرې میاشتې ټولنې استازي ته د ښه راغلاست تر څنګ له دغه پوهنتون سره د همکاریو په موخه مننه وکړه او ویې ویل: چې کابل طبي علومو پوهنتون دوه اړخیزو همکاریو، په ځانګړي ډول د زړه ناروغیو د تشخیص او درملنې په برخه کې چمتو دی.
نوموړي زیاته کړه چې د کابل طبي علومو پوهنتون اړوند د زړه، سینې او رګونو ناروغیو انستیتیوت په دې وروستیو کې د زړه ناروغیو د تشخیص، درملنې او پېچلیو عملیاتونو په تر سره کولو کې ښې لاسته راوړنې لري چې د قطر هېواد سرې میاشتې ټولنې په مرستو سره به دغه لاسته راوړنې لا زیاتې شي.
د قطر سرې میاشتې ټولنې استازي احمد العثماني د کابل طبي علومو پوهنتون مشرتابه هیئت په ځانګړې توګه د دغه پوهنتون رئیس له نیک نظر څخه خوښي څرګنده کړه او ویې ویل چې دغه بنسټ د افغانستان په کچه د زړه ناروغیو د تشخیص، درملنې او د زړه پېچلیو عملیاتونو د مالي ملاتړ په برخه کې همکاریو ته چمتو دی.
احمد العثماني او ورسره پلاوي د صدري او قلبي وعایي ناروغیو انسټيټیوټ څخه د لیدنې تر څنګ د دغه انستیتیوت مشرتابه هیئت سره د دغه انسټيټیوټ د خدماتو، ستونزو او امکاناتو په اړه خبرې وکړې او له دغه انسټيټيوټ سره یې د هر اړخیزو همکاریو ژمنه وکړه.
دا په داسې حال کې ده چې څه موده وړاندې سویسي ډاکټرانو افغانستان ته سفر کړی و او د صدري قلبي وعایي ناروغیو انسټيټيوټ د ډاکټرانو په همکارۍ یې د زړه ۱۰ پېچلي عملیاتونه په بریالي ډول تر سره کړل.
