د کابل طبي علومو پوهنتون اړوند ستوماتولوژي تدریسي روغتون د مخ او ژامې جراحي ډيپارټمنټ ډاکټرانو په یوه نادره طبي پېښه کې د پروان ولایت اوسېدونکي یو ۱۷ کلن ناروغ د پروتید لعابیه غدې څخه ۳۱ ډبرې وایستلې.
د وجه جراحي متخصص سید هدایت الله سادات وايي چې ناروغ له اووه کلونو راهيسې له درد پرته د مخ کيڼ لوري متوسط پړسوب له امله روغتون ته مراجعه کړې وه چې د MRI With contrast او الټراسونډ معایناتو وروسته د پروتید (Parotid) لعابیه غده کې یې د یو شمېر ډبرینو کتلو (Calcified) شتون تثبیت شو. د دغه تشخیص له مخې ناروغ ته د عمومي انستیزي په تطبیق کولو سره د انسیژن Retro Mandibular او Sialolithotomy یا له پروید غدې څخه د ډبرو ایستلو پروسیجر ترسره شو.
د یادولو وړ ده چې د ډبرو له ایستلو وروسته لاعابیه غده بېرته تړل شوېده چې د ناروغ حالت له عملیات وروسته د ډاډ وړ بلل شوی او تر روغتیايي څارنې لاندې دی.
