د کابل ابوعلی ابن سینا طبی علومو پوهنتون او د ا.ا.ا. د لوړو زده کړو وزارت د مشرتابه غړو ګډه ناسته
1400 کال، د تلې 6 مه
د کابل ابوعلی ابن سینا طبي علومو پوهنتون او د لوړو زده کړو وزارت ګډه ناسته د کابل ابوعلی ابن سینا طبی علومو پوهنتون د رئیس ښاغلی ډاکټر محمد اقبال حماد، د لوړوزده وزارت د نشراتو، ارتباطاتو او عامه اړیکو چارسمبال رئیس ښاغلی ډاکټر سیلاب دلاور، ښاغلی شیخ الحدیث شاه محمد، معاونینو، د پوهنځیو رئیسانو، استادانو او اداری کارکوونکو په ګډون د ابوعلی سینا بلخی په لوی تالار کی ترسره شوه.
غونډه د لوی خدای (ج) د کلام په تلاوت سره پیل شوه. ورپسې، د پوهنتون رئیس ډاکټر محمد اقبال حماد ګډونوالو ته د ښه راغلاست ترڅنګ، د افغانستان د اسلامي امارت بریا او په هیواد کې د اشغال پای مبارکي ټولونکې ته وویله او د پوهنتون له ټولو استادانو او کارمندانو یې وغوښتل چې د مسلکی کادرونو د ښوونی او روزنی د پرمختګ او د هیواد په ودانولو کی سره ګډی هڅی وکړی او د ټولو استادانو او روغتیایی پرسونل چی د وګړو د روغتیا لپاره ستونزی ګالی مننه وکړه.
د لوړو زده کړو وزارت د نشراتو، اطلاعاتو او عامه اړیکو چارسمبال رئیس ښاغلی ډاکټر سیلاب دلاور د قران او ساینس او د دې سپیڅلي کتاب د معجزو بیلابیلو ابعادو په اړه خبرې وکړې او ګډونوالو ته یې مفصل معلومات وړاندې کړل.
په یاده غونډه کې، ښاغلی شیخ الحدیث مولوي شاه محمد د افغانستان د اسلامي امارت د پلانونو او اهدافو په اړه خبرې وکړې او د بښنی، سولې، امنیت او د اسلام د سپیڅلي دین د حاکمیت په اړه یې لازم توضیحات ورکړل. او د امنیت، هوساینی او زده کړو په اړه یی په ټول هیواد کې ډاډ ورکړ او ټول استادان او کارمندان یې کار کولو او زیار ایستلو ته وهڅول.
همدارنګه، د پوهنتون علمی مرستیال پوهاند ډاکټر نجیب الله امرخیل، د طبي زده کړو پراختیا رییس پوهاند ډاکټر احمد فرید برنایار او د پوهنتون د اسلامي ثقافت څانګې استاد پوهندوی عبدالخالق مصباح پر خپل وار د استادانو په استازیتوب خبرې وکړې او ډاډ یې ورکړ چې له هیڅ ډول هڅو د هیواد د پرمختګ لپاره ډډه نه کوي او په دولتي پوهنتونونو کې د زده کړیالانو د زده کړو د ژر تر ژره پیل کیدو غوښتونکی شول.
غونډه د یاد پوهنتون د اسلامی ثقافت څانګی استاد، پوهنمل سیدآقا سائس په دعائیی سره پای ته ورسیدله.
