د میکروب ضد درملو پر وړاندې د میکروبونو مقاومت لومړنی کلنی کنفرانس دایر شو.
کابل طبي علومو پوهنتون دغه کنفرانس د میکروب ضد (انټي بیوتيک) درملو د مصرف او د هغه علمي څېړنو د پایلو شریکولو په موخه چې د دغه بنسټ د علمي غړیو لخوا د "په خپل سر" درمل خوړلو ، د درملو اندازه، د میکروبونو په مقابل کې د انټي بیوټيک مقاومت رامنځته کېدو لاملونو او میکروب ضد درملو څخه ناسمې ګټه اخیستنې د عوارضو په اړه د عامه پوهاوي په موخه د Getz Pharma کمپنۍ په همکارۍ جوړ کړ.
د کابل طبي علومو پوهنتون رئيس دوکتور مفتي اسدالله نجات د انټي بیوټيک درملو مصرف د انسان ژوند لپاره مهم وباله او ویې ویل چې د انټي بیوټيک درملو څخه د ګټه اخیستنې په اړه باید په ښه ډول پوهاوی ترسره شي، د میکروب ضد درملو ناسمه کاورنه او په خپل سر د انټي بیوټيک درملو کارول د دې سبب شوی چې پر ډېرو ناروغانو اغېز ونه لري ، نوموړي زیاته کړه چې باید په روغتونونو کې د میکروب ضد درملو د تجویز بر رسي وشي تر څو معلومه شي چې دغه درمل د کومې ناروغۍ په مقابل کې حساس او مقاوم دي. دوکتور نجات وویل چې د څېړنو د زیاتې ودې او پرمختګ لپاره د کابل طبي علومو پوهنتون نړیوال طبي ژورنال رامنځته کړی تر څو هغه استادان چې د طب په برخه کې څېړنه کوي، څېړنیزې پایلې یې په دغه ژورنال کې نشر شي څو نړیوال ارزښت پیدا کړي.
په دغه ناسته کې د لوړو زده کړو وزارت ارشد مشاور د دغه وزارت په استازیتوب د دا ډول کنفرانسونو جوړېدل د طب په برخه کې د پر مختګ او پر ځان بسیا کېدو لپاره مهم وګڼل او ویې ویل چې د لوړو زده کړو وزارت د داسې کنفرانسونو له جوړېدو قدر داني او ملاتړ کوي نوموړي زیاته کړه د استادانو د علمي څېړنو لپاره د آسانتیاوو برابرول د دغه وزارت له مکلفیتونو څخه دي.
د کنفرانس په دوام د اړیکو او عامه پوهاوي آمر استاد صبغت الله سجاد په پوهنتون کې د هغه پرمختګونو او پراختیا په اړه چې په وروستیو دوه کلونو کې د علمي څېړنو په برخه کې رامنځته شوي او همدا رنګه په نړیوال طبي ژورنال کې د نړۍ په کچه د استادانو د مقالو د نشر په اړه وینا وکړه او هر اړخیز معلومات یې وړاندې کړل.
د یادولو وړ ده چې د میکروب ضد( انټي بیوټيک) درملو په مقابل کې د میکروبونو مقاومت په هېواد کې په یو ګواښ بدل شوی دی او خلک باید د دا ډول درملو له ناسمې کارونې څخه په جدي توګه ځان وساتي، چې په همدې موضوع د کابل طبي علومو پوهنتون استادانو له لوري څېړنیزې مقالې وړاندې شوې چې ګډونوالو ته ډېرې په زړه پورې وې.
