د بغلان ولایت سیلاب ځپلو سیمو ته یو مجهز روغتیایي پلاوی ولېږل شو.
د لوړو زده کړو وزارت د محترم وزیر شیخ الحدیث مولوي نداء محمد ندیم په ځانګړې لارښوونه او د کابل طبي علومو پوهنتون «ابو علي ابن سینا» د رئیس دوکتور مفتي اسدالله نجات تر مشرۍ لاندې شمالي ولایتونو کې په خاص ډول د بغلان ولایت د وروستیو سېلابونو له امله د زیانمنو شویو وګړو سره د لازمو روغتیایي مرستو لپاره دغه ولایت ته یو مجهز پلاوی ولېږل شو.
دغه روغتیايي ټیم چې په رأس کې یې د میوند تدریسي روغتون ریس دوکتور سیدالرسول منګل قرار لري، په بېړنیو حالاتو کې د ټپیانو د انتقال او درملنې لپاره پر امبولانس او درملو مجهز دی چې په مختلفو سیمو کې به له سېلاب ځپلو سره مرسته کوي.
ټاکل شوې سیمې ته به د کابل طبي علومو پوهنتون له تدریسي روغتونونو څخه نور روغتیایي ټيمونه هم و استول شي.
