د کابل طبي علومو پوهنتون اړوند سینې، زړه او رګونو ناروغیو په انسټېټیوټ کې د ECG روزنیز تخصصي پروګرام پیل شو. دغه پروګرام چې ۷ ورځې به دوام ولري، د زړه عاجلو پېښو ته درسېدنې په ګډون په بېلابېلو برخو کې نظري او عملي زده کړې پکې شاملې دي.
د یاد انسټېټیوټ د زړه او رګونو ډيپارټمنټ غړي ډاکټر فردین بري په وینا د دغه دورې د پيل موخه د مدیریت او تشخیص په ځانګړي ډول د زړه عاجلو پېښو مراقبت په برخو کې د ټریني ډاکټرانو د ظرفیت لوړول دي.
ګډونوالو د یاد پروګرام له پیل کېدو څخه خوښي څرګنده کړه او د تخصصي روزنیزو پروګرامونو جوړېدل یې د هغوی د مسلکي پوهې په لوړوالي کې مهم وبلل او په راتلونکي کې د دغه ډول پروګرامونو پر دوام او پراخوالي یې ټینګار وکړ.
