په علی آباد تدریسي روغتون کې د (ملا فقراتو هیداتیک کېست) جراحي عملیات بریالی ترسره شو.
هغه ناروغ چې له لوړ ځای څخه د لوېدو له امله یې د ملا مهره ماته شوې وه، د ملا او پښې له درد څخه يې شکايت درلود؛ چې د کابل طبي علومو پوهنتون اړوند علي آباد تدریسي روغتون ته تر مراجعې او له لازمو معايناتو وروسته د دغه روغتون د اعصابو جراحي څانګې د متخصصينو له لوري یې عمليات بریالی ترسره شو.
د اعصابو جراحي متخصص پوهنمل ډاکټر حسیب الله بها نجرابي ویې ویل چې تر معایناتو وروسته د ناروغ په ملا کې هیداتیک کېست وموندل شو. هغه زیاته کړه چې د ملا فقراتو هیداتیک کېست رامنځته کېدل د اعصابو جراحي په برخه کې له خورا نادرو پېښو څخه ده، ځکه چې د دغه کېست رامنځته کېدل په ځیګر، سږو، ماغزو او نورو برخو کې معمول دی.
ډاکټر نجرابي د ناروغ روغتيايي حالت د ډاډ وړ وباله او ویې ویل، چې ناروغ تر درملنې لاندې دى او تر ښه کېدو وروسته به له روغتون څخه رخصت شي.
د يادونې وړ ده، چې څه موده وړاندې د علي آباد تدریسي روغتون د اعصابو جراحي څانګې د ماغزو هیداتیک کېست هم په برياليتوب سره ترسره کړی وو.
