د کابل طبي علومو پوهنتون د نظارت او ارزونې هیئت له میوند تدریسي روغتون څخه لیدنه وکړه
د کابل طبي علومو پوهنتون له لوري د مالي او اداري چارو مرستیال مولوي عبد الرحمن مرحوم په مشرۍ او روغتیایي موسسو چارو مرستیال ډاکټر محمد هاشم ځاځي، د خدماتو، تدارکاتو، مالي او حسابي او کارکوونکیو چارو آمرینو په ګډون د میوند تدریسي روغتون له رئیس ډاکټر سید رسول منګل سره د لیدنې تر څنګ د یاد روغتون روغتیایي او اداري چارو، تدارکاتي پروژو، قراردادونو او عوایدو څانګو څخه لیدنه او نظارت وکړ.
د پوهنتون مالي او اداري چارو مرستیال د روغتون له رئیس سره د لیدنې پر مهال د ناروغانو لپاره د غوره روغتیایي خدماتو وړاندې کولو، او یاد روغتون په چارو کې پر روڼتیا او ريښتینولۍ باندې ټينګار وکړ او له ټولو مسوولینو یې غوښتنه وکړه چې د غوره روغتیایي او اداري چارو په تر سره کولو کې اخلاص، همکاري او همغږي په پام کې ولري.
له بلې خوا د میوند تدریسي روغتون رئيس په بېلابېلو برخو کې د وروستیو فعالیتونو او لاسته راوړنو په اړه معلومات وړاندې کړل او د پوهنتون رهبرۍ څخه یې د ستونزو له منځه وړلو او همکارۍ غوښتنه وکړه.
د یادولو وړ ده چې د کابل طبي علومو پوهنتون اړوند میوند تدریسي روغتون ځوانو ډاکټرانو ته د روزنې تر څنګ د جلدي، ماشومانو داخلې، ماشومانو جراحي، غوږ او ستوني او پلاستیکي جراحي په برخو کې فعالیت کوي.
