علي آباد تدریسي روغتون کې د (څېړنې میتود) ښوونیز ورکشاپ پيل شو
د کابل طبي علومو پوهنتون د طبي زده کړو پراختیا ریاست د څېړنو آمریت په همکارۍ د علي آباد تدریسي روغتون د داخله او عمومي جراحي څانګې د اکمال تخصص پروګرام ټريني ډاکټرانو ته د ظرفیت لوړولو او له څېړنیزو مېتودونو سره بلدتیا په موخه د څېړنې میتود په اړه روزنیز ورکشاپ پیل کړ.
د پوهنتون علمي مرستیال پوهاند دوکتور نجيب الله امرخېل ټریني ډاکترانو ته د دغه ورکشاپ جوړېدل ښه اقدام وباله او ويې ویل چې علم د څېړنو او تجربو پر بنسټ تر لاسه کېږي، نوموړي زیاته کړه چې د طب په برخه کې څېړنې د دې لامل کېږي څو په نویو مېتودونو سره د تشخیص او درملنې پروسه لا ښه کړو.
د علي آباد تدریسي روغتون رئیس ډاکټر عبدالمطلب شینواري د دغه ورکشاپ له جوړېدو خوښي څرګنده کړه او ویې ویل: «ټریني ډاکټرانو ته د هغوی د ظرفیت لوړولو او د علمې کچې زیاتولو په برخه کې د علمي پروګرامونو جوړول مهم او اړین دي او په راتلونکي کې زیات امکانات لرو چې داسې پروګرامونه جوړ کړو.»
د يادونې وړ ده، چې دغه ورکشاپ يوه اونۍ دوام لري او په راتلونکي کې به هم د دغه پوهنتون په ټولو کادري روغتونونو کې د څېړنې مېتود روزنيز ورکشاپونه جوړ او دوام ولري.
