په همدې مناسبت جوړ شويو مراسمو کې چې د لوړو زده کړو وزارت یو شمېر مسوولینو، پوهنتون رهبري هیئت، علمي کادر غړیو او کارمندانو حضور درلود، شیخ الحدیث مفتي احسان الله ابوالفیضان صاحب په رسمي توګه د کابل طبي علومو پوهنتون د نوي رئیس په توګه معرفي شو.
په مراسمو کې د لوړو زده کړو وزارت مالي او ادري چارو معین مولوي حافظ محمد حامد حسیب صاحب په خپلو خبرو کې د علم پراختیا پر اهمیت او د زده کړو کیفیت پر ښه والي ټینګار وکړ او زياته يې کړه، چې دا ټاکنه يو امتياز نه بلکې امانت او مسؤليت دی. نوموړي د نوي رئيس لپاره د لوی خدای ج څخه په چارو د بریالیتوب غوښتنه وکړه.
همدارنګه د پوهنتون نوي رئیس د ا.ا.ا او د لوړو زده کړو وزارت مسؤولینو له باور او اعتماد څخه د خوښۍ تر څنګ د ورسپارل شوي مسؤولیت په اړه خبرې وکړې او د یاد پوهنتون د تحصيلي او روغتیایي کچې د کیفیت لوړېدو او ښه والي لپاره پر خپله ژمنه ټينګار وکړ.
