په علي آباد تدریسي روغتون کې د لویو او وړو عملیاتونو ۱۸۸ سلنه زیاتوالی
په دې وروستيو کلونو کې د کابل طبي علومو پوهنتون اړوند علي آباد تدریسي روغتون په مختلفو برخو کې په لویو او وړو عملیاتونو کې زیاتوالی راغلی.
د علي آباد تدریسي روغتون د راپور پر بنسټ په تېرو دریو کلونو کې په دغه روغتون کې د ترسره شویو عملیاتونو شمېر د ۱۸۸ سلنه په زیاتوالي سره د پام وړ پرمختګ څرګندوي.
په دغه راپور کې راغلي دي چې په ۱۳۹۹ هـ ش کال کې د عملیاتونو شمېر ۲۰۰۰ او له ۱۳۹۹ هـ ش کال وروسته دغه شمېر ۶۰۰۰ ته رسېدلی دی.
د یادولو وړ ده چې علي آباد تدریسي روغتون بېلابېل عملیاتونه لکه: د ورمېږ مهرو او د زنګون مفصلونو بدلول، مغزي تومورونو، معدې، مرۍ، کولمو سرطانونو او نور نادر او پېچلي عملیاتونه په بریاليتوب ترسره کړي دي.
