په علي آباد تدریسي روغتون کې د آنکولوژۍ (سرطاني) ناروغیو د جراحي او داخلې څانګه د لوړو زده کړو سرپرست وزیر له خوا افتتاح شوه

د کابل طبي علومو پوهنتون اړوند په علي آباد تدریسي روغتون کې د سرطاني نارغیو د جراحي او داخلې څانګه په دغه روغتون کې رامنځته شوې، ترڅو په سرطان ناروغۍ باندې د اخته ناروغانو درملنه پکې وشي چې نن د لوړو زده کړو وزارت سرپرست وزیر شیخ الحدیث مولوي ندا محمد ندیم لخوا د یو لړ مراسمو په ترڅ کې افتتاح شوه.
په دغه مراسمو کې د کابل طبي علومو پوهنتون رئیس پوهنیار ډاکټر فضل الرحمن رحماني د ناروغیو له امله د مړینې لاملونه ته په اشارې وویل: « د نړۍ او افغانستان په کچه د سرطان ناروغي د نورو ناروغیو په پرتله تر ټولو زیات شمېر مړینې لري، په همدې موخه په علي آباد تدریسي روغتون کې د سرطاني ناروغیو د جراحي او داخلې څانګه جوړه شوه، تر څو د سرطاني ناروغانو درملنه وشي، هغه زياته کړه، چې د سرطاني ناروغيو د پاملرنې او کنټرول لپاره د تشخيص، شعایي، جراحي او داخلې څانګو ته اړتيا ده» په دې اړه پوهنیار رحماني په علي آباد تدریسي روغتون کې د سرطان د تشخیص او درملنې جامع مرکز د پروژې په اړه چې د جوړېدو چارې یې ۹۰ سلنه بشپړې شوې، یادونه وکړه او له ټولو روغتیايي سازمانو او خیریه بنسټونو یې وغوښتل، چې د دغه جامع مرکز په جوړولو کې مرسته او  همکاري وکړي. 
د دغه مراسمو په لړ کې د لوړو زده کړو وزارت سرپرست وزیر د سرطاني ناروغیو د درملنې په برخه کې د سرطاني ناروغیو د جراحي او داخلې څانګې جوړېدل مهم و بلل او زیاته یې کړه، د دغه څانګې جوړېدل زموږ هغه هېوادوالو ته چې پر سرطاني  ناروغیو اخته دي او د درملنې لپاره بهرنیو هېوادونو ته سفر کوي، لوی خدمت دی. مولوی ندیم د خپلو خبرو په دوام کې يوځل بیا بهرنیو هېوادونو ته له تللیو علمي کادرونو څخه وغوښتل چې بېرته هېواد ته راشي او خپلو هېوادوالو ته خدمت وکړي . 
همدا راز د علي آباد تدریسي روغتون رئیس ډاکټر عبدالمطلب شینواري د سرطاني ناروغیو د جراحي او داخلې څانګې د جوړېدو او د دې روغتون د زېر بنایي او نورو روغتیایي لاسته راوړنو په اړه خبرې وکړې او ویې ویل چې په راتلونکي کې به د دغه روغتون د روغتیايي څانګو د پراختیا شاهدان واوسو.