د کابل طبي علومو پوهنتون علمي شورا فوق العاده غونډه د لوړو زده کړو وزیر شیخ الحدیث مولوي نداء محمد ندیم صاحب په حضور ترسره شوه. په دغه ناسته کې د پوهنتون د ودې او پراختیا لپاره رغنده نظریات، وړاندیزونه او د ستونزو د حل په اړه هر اړخیز بحث وشو.
د غونډې په پیل کې د کابل طبي علومو پوهنتون رئیس شیخ الحدیث مفتي احسان الله ابوالفیضان د لوړو زده کړو وزیر صاحب ته د ښه راغلاست تر څنګ پوهنتون ته د راتلو او د دغه بنسټ علمي او اکاډمیکو مسایلو ته له پاملرنې ستاینه وکړه.
وروسته بیا د لوړو زده کړو وزیر صاحب په دغه غونډه کې له ګډون څخه د خوښۍ په څرګندولو سره کابل طبي علومو پوهنتون د هېواد د لوړو زده کړو له معتبرو بنسټونو څخه وګڼلو او له ټولو مسوولینو یې وغوښتل څو د یاد پوهنتون د پراختیا او ودې په برخه کې لا زیاتې هڅې وکړي.
د ناستې په جریان کې د پوهنتون رهبرۍ له لوري یو شمېر مهم علمي او زېربنايي موضوعات شریک او مطرح شول او د لوړو زده کړو وزیر صاحب د پېشنهادونو د اورېدو تر څنګ د دغه پروګرامونو ترسره کېدو د هر اړخیزې همکارۍ ژمنه وکړه.
همدارنګه د پوهنتون استادانو هم د تدریسي، څېړنیزو او روغتیایي خدماتو وړاندې کولو لپاره د غوره زمینې برابرولو په اړه نظریات او پېشنهادونه وړاندې کړل چې د لوړو زده کړو وزیر صاحب له لوري په پوره غور سره واورېدل شول.
سې شنبه د ۱۴۰۴/غبرګولي ۱۳ مه
د ۱۴۴۶/ ذوالحجې ۶ مه
