د کابل طبي علومو پوهنتون ستاژرانو او محصلینو ته "په بېړنیو حالاتو کې لومړنۍ مرستې" تر عنوان لاندې روزنیز پروګرام، چې موخه یې د ستاژرانو او محصلینو مسلکي کچې لوړول دي، د دغه پوهنتون د رهبرۍ یو شمېر غړیو په ګډون پیل او دوه ورځې به دوام وکړي.
د کابل طبي علومو پوهنتون رئیس پوهنیار دوکتور مفتي اسدالله نجات د پروګرام له جوړېدو خوښي څرګنده کړه او ویې ویل: "دغه پوهنتون تل هڅه کوي چې د محصلينو د ظرفیت او پوهاوي کچې لوړولو لپاره بېلابېل پروګرامونه تنظیم کړي؛ څو ټولنې ته تکړه ډاکټران وړاندې کړي." ښاغلي نجات همدارنګه له ټولو ګډونوالو او محصلانو څخه وغوښتل چې له دې پروګرام څخه ډېره ګټه پورته کړي.
دا پروګرام د افغانستان د پرمختګ موسسې (Prosper Afghanistan) په همکارۍ چې په لندن کې د مسلمانانو په مشرۍ یوه اداره ده او د یو سوکاله او پیوسته افغانستان په موخه کار کوي، جوړ شوی او په دې دوه ورځو کې به درې تنه ډاکټران چې له لندن څخه راغلي، ستاژرانو او محصلانو ته د بېړنیو پېښو او اضطراري حالتونو ته په مناسپ ډول رسېدنې په موخه، ۱۳ لکچرونه وړاندې کړي.
د یادولو وړ ده چې د دغه پروګرام له پای ته رسېدو وروسته به د لومړنیو مرستو او بيړنیو پېښو په اړه د ډاکټرانو او یادې موسسې د ټیم له لوري په تدریسي روغتونونو کې ستاژرانو ته په عملي کارو کې هم روزنه ورکول کېږي.
