د کابل طبي علومو پوهنتون اړوند سترګو تدریسي روغتون تازه معلومات ښیي چې د روان کال غويي میاشتې په لړ کې د دغه روغتون روغتیايي خدماتو او جراحي عملیاتونو په شمېر کې د پام وړ زیاتوالی راغلی.
د وړاندې شويو شمېرو پر اساس په وري میاشت کې د سترګو ۱۶۰ عملیاتونه په یاد روغتون کې ترسره شوي وو، په داسې حال کې چې دغه شمېر د غويي په میاشت کې ۳۳۱ ته رسېدلی دی. دا د جراحي عملیاتونو په شمېر کې له ۱۰۰سلنې زیات، زیاتوالی ښيي.
همدا رنګه د سراپا (OPD) خدماتو په برخه کې هم د غويي په میاشت کې زیاتوالی راغلی دی. په وري میاشت کې له ۳ زرو څخه زیاتو کسانو ته د (OPD) خدمات ترسره شوي وو، په داسې حال کې چې په ثور میاشت کې دغه شمېر ۵ زرو تنو ته رسېدلی دی، دا شمېر په سراپا خدماتو کې ۶۴ سلنه زیاتوالی ښيي.
