د کابل طبي علومو پوهنتون اړوند روغتیايي تکمیلي علومو پوهنځي د طبي انجنیري ټکنالوجۍ ديپارټمنټ فارغو محصلانو د لېسانس دورې پروژو د دفاع غونډه ترسره شوه. په دغه پروګرام کې فارغو محصلانو پينځه پایې طبي ماشینونه چې د آنکوباتور (Incubator)، (Infant Warm Care)،
د کابل طبي علومو پوهنتون اړوند روغتیايي تکمیلي علومو پوهنځي د طبي انجنیري ټکنالوجۍ ديپارټمنټ فارغو محصلانو د لېسانس دورې پروژو د دفاع غونډه ترسره شوه. په دغه پروګرام کې فارغو محصلانو پينځه پایې طبي ماشینونه چې د آنکوباتور (Incubator)، (Infant Warm Care)، د جراحي پورټيبل چراغ، د سیرومو ګرم کوونکی ماشین (Serum Warmer) او ماوراء وړانګو لروونکی اسټریل ماشین پکې شامل او د خپل وروستي کال پروژو د دفاع په موخه یې جوړ کړي وو؛ نندارې ته وړاندې کړل.
د کابل طبي علومو پوهنتون رئیس شیخ الحدیث مفتي احسان الله ابوالفیضان په علمي او فني ظرفیت لوړونه کې د طبي انجنیري ټکنالوجۍ ډيپارټمنټ د ارزښت په اړه خبرې وکړې، د طبي وسایلو په جوړولو کې یې د یاد ډيپارټمنټ هڅې او نوښتونه وستایل او زیاته یې کړه چې د کابل طبي علومو پوهنتون رهبري هڅه کوي چې په دغه ډيپارټمنټ کې د طبي وسایلو د تولید او پراختیا لپاره لا زیاته زمینه برابره کړي.
وروسته بیا د روغتیايي تکمیلي علومو پوهنځي رئیس پوهنمل ډاکټر محمد بلال عمري د طبي انجنیري ټکنالوجۍ ډيپارټمنټ د مخینې او طبي تخنیک په برخه کې د مسلکي کادرونو په روزنه کې د دغه ډيپارټمنټ د ونډې په اړه معلومات وړاندې کړل.
د غونډې په دوام د هر ګروپ په استازیتوب سره فارغانو خپل طراحي شوي طبي وسایل ګډونوالو ته ور وپېژندل او په رسمي ډول یې د خپلو پروژو دفاع وکړه.
یاده غونډه د ګډونوالو له تود هرکلي او د فارغانو له دغه نوښتونو څخه د استادانو په ستاینې پای ته ورسېد.
