د کابل طبي علومو پوهنتون "ابو علي ابن سینا" د نړیوال ژورنال کمېټې غونډه ترسره شوه.
نن دوشنبه د ۱۴۴۴ هـ ق کال د شعبان المعظم میاشتې پر ۱۳ نېټه د کابل طبي علومو پوهنتون ابو علي ابن سینا په ریاست مقام کې د افغان طبي نړیوال ژورنال کمېټې غونډه د دغه پوهنتون د رئیس پوهنیار دکتور فضل الرحمن رحماني په مشرۍ ترسره شوه.
د غونډې په پیل کې د کابل طبي علومو پوهنتون رئیس پوهنیار دکتور فضل الرحمن رحماني ګډونوالو ته ښه راغلاست وویل او د افغان طبي نړیوال ژورنال د ترسره شوي کار جریان یې شریک کړ.
وروسته د پوهنتون مالي او اداري مرستیال د ژورنال ویبسایټ جوړېدو پروسې په اړه معلومات وړاندې کړل هغه وویل: " د ویب سايټ جوړولو قرارداد له خصوصي شرکت سره ترسره شوی او د مالیه وزارت له تایید څخه وروسته په څو راتلونکو ورځو کې به یې عملي چارې پیل شي." همداراز هغه وویل: "د راتلونکي ۱۴۰۲ کال په تشکیل کې یې د نړیوال ژورنال لپاره اداري تشکیل هم په پام کې نیولی دئ."
په یاده غونډه کې د کابل پولي تخنیک پوهنتون د نړیوال ژورنال آمر استاد احمد جواد نیازي خپلې تجربې او مشورې د لازمو او عاجلو اقداماتو لپاره شریکې کړې او ویې ویل: د نړیوال ژورنال لپاره د ویبسایټ رامنځته کول او په چاپي بڼه یې یوه ګڼه خپرول حتمي دي.
بیا د تحقیقاتو آمر پوهنوال ولي ناصري د نړیوال ژورنال د رامنځته کېدو په اړه هغه اقدامات چې مخکې د نړیوال روغتیایي سازمان یا WHO په همکارۍ ترسره شوي وو د غونډې له ګډون والو سره شریک کړل.
د غونډې په پای کې د ګډونوالو د بحث او مشورې وروسته د نړیوال ژورنال د کارونو د ښه او چټک پرمختګ لپاره مسؤولو کسانو ته لازمې مشورې او لارښوونې ورکړل شوې.
