د نسایي ولادي او سترګو ناروغیو په تدریسي روغتونونو کې تر پخوا اوس ناروغانو ته زیاتې آسانتیاوې رامنځ ته شوې دي
د کابل طبي علومو پوهنتون ابو علي ابن سینا د مالي او اداري چارو مرستیال مولوي عبدالرحمن مرحوم او ورسره پلاوي د یاد پوهنتون اړوند د شهرآرا له سترګو ناروغیو او نسایي ولادي تدریسي روغتونونو څخه لیدنه وکړه او د یادو روغتونونو د مالي او اداري څانګو فعالیتونو یې وارزول.
د سترګو ناروغیو او نسایي ولادي تدریسي روغتونونو مسؤلینو دغه پلاوي ته د خپلو لاسته راوړنو او پرمختګونو په اړه معلومات وړاندې کړل، او په وینایې د نویو طبي وسایلو په ترلاسه کولو سره اوس مهال ناروغانو ته زیاتې اسانتیاوې رامنځ ته شوې او زیاتره لابراتواري معایانات د روغتون په داخل کې ترسره کیږي.
د پوهنتون مالي او اداري مرستیال مولوي عبدالرحمن مرحوم د یادو روغتونونو د کارکوونکو له کړنو ستاینه وکړه او هغوی ته یې په چارو کې د اخلاص او ناروغانو ته په ښه ډول د خدمتونو ترسره کولو لازمې سپارښتنې وکړې.
