د لوړو زده کړو وزارت سرپرست وزیر له لوري په علي آباد تدریسي روغتون کې د یوې ودانۍ د بنسټ ډبره کېښودل شوه
د دغې ودانۍ ډبره په درې پوړونو کې د علي آباد تدریسي روغتون په انګړ کې د The House of Fragranceخیریه بنسټ له لوري د ۲۵۰ زره امریکايي ډالرو په ارزښت د لوړو زده کړو وزیر شیخ الحدیث مولوي نداء محمد ندیم له لوري د پوهنتون، علي آباد روغتون او ياد بنسټ د مسوولینو په حضور کې کېښودل شوه.
په دې مناسبت جوړه شوې ناسته کې د لوړو زده کړو سرپرست وزیر وویل چې د دې ودانۍ جوړېدل د خدمت په لار کې لوی ګام اېښودل دي، نوموړي زیاته کړه چې په هېواد کې داسې وطن پاله خلک لرو چې ملت ته د خیر رسونې لپاره هڅه کوي. سرپرست وزير ددغې ودانۍ د جوړېدو له امله يې د یاد بنسټ له مالي ملاتړ څخه خوښي څرګنده کړه.
په همدې حال کې د کابل طبي علومو پوهنتون سرپرست رئيس دوکتور مفتي اسد الله نجات د دغې پروژې له ټولو مسوولینو څخه چې په دې برخه کې یې هڅه او زیار ایستلی مننه وکړه.
د یادولو وړ ده چې یاده ودانۍ له یوې تهکوي سره په درې پوړونو کې په معیاري ډول په شپږو میاشتو کې بشپړېږي.
