د ستوماتولوژي تدریسي روغتون OPG اکسرې ماشین بیا فعال شو
د کابل طبي علومو پوهنتون اړوند د طبي انجنیري ډيپارټمنټ د مسلکي تیم او استادانو لخوا د ستوماتولوژي تدریسي روغتون یوه پایه OPG اکسرې ماشین له اتو کلنو راهیسې له کاره لوېدلی و، ترمیم او بیا فعال شو.
د دغه ډيپارټمنټ استاد انجنیر فیصل عثماني وویل چې له یاد ماشین څخه د تخنیکي ستونزې او د خطا عکس ښودلو له امله ګټه نه اخیستل کېده چې اوس فعال او ګټه ترې اخیستل کېږي.
د عثماني په وینا د طبي انجنیري ډيپارټمنټ په پام کې لري چې په ستوماتولوژي تدریسي روغتون کې د ډيجیټلي (C.R ) عکس اخیستلو سیستم هم په کار واچوي.
د یادولو وړ ده چې د طبي انجنیري ډيپارټمنټ د پوهنتون اړوند تدریسي روغتونونو ډېری طبي وسایل او ماشینونه ترمیم او فعال کړي دي.
