د سترګو ليد نړیوالې ورځې په مناسبت د سترګو د ساتنې عامه پوهاوي غونډه ترسره شوه.
هغه ناسته چې په همدې موخه د روان ١٤٠١ کال د تلې په ٢١ مه نېټه د کابل طبي علومو پوهنتون ابو علي ابن سینا اړوند د سترګو په تدريسي روغتون کې جوړه شوې وه د دغه روغتون د رییس ښاغلي ډاکتر بشیر عثماني د نور روغتون رییس ډاکتر زاهد ګل ځدراڼ او د افغانستان د سترګو ټولنې استازي سربېره د د سترګو تدریسي روغتون استادانو او کارکوونکو هم برخه لرله.
د غوندې په پیل کې ډاکتر بشیر عثماني وویل: " افغانستان کې د سترګو بېلابېلو ناروغیو او ستونزو له امله شپږ سوه زره کسان د سترګو د لید له نعمت څخه بې برخې دي، چې زیاتره یې د سترګو پردې د رامنځته کېدو له امله ړانده شوي دي چې اوس مهال د هېواد په کچه د شلو زرو سترګو ناروغانو د درملنې امکانات او شونتیا شته، چې د یادو امکاناتو او هېوادوالو ته د سترګو ناروغیو درمنلې په برخه کې د چوپړتیاوو د پراخولو چټکې هڅې روانې دي."
همداراز د نور روغتون رييس د افغانستان د سترګو ټولنې استازي او د یاد روغتون ځینو ډاکترانو هم په خپل نوبت سره ویناوې واورولې او له دینې او علمي اړخه یې د سترګو پر ارزښت ساتنې او په هېواد کې د سترګو ناروغیو د وقایوي تدابیرو په اړه رڼا واچوله.
د یادونې وړ ده چې د کابل طبي علومو پوهنتون ابو علي ابن سینا د سترګو تدریسي روغتون د سترګو لید نړیواله ورځ او د سترګو د ساتنې په اړه د عامه پوهاوي غونډه داسې مهال ترسره کوي چې څه موده وړاندې دغه روغتون یو شمېر مجهز طبي وسایل پیرلي، چې پرمټ یې اوس د سترګو لایزري عملیات هم ترسره کیږي.
