په تدریسي روغتونونو کې د اداري فساد پر وړاندې د مبارزې او له ناروغانو سره د نېک چلند په اړه د عامه پوهاوي پروګرام بهیر پای ته ورسېد
د کابل طبي علومو پوهنتون مالي او اداري چارو مرستیال مولوي عبد الرحمن مرحوم په مشرۍ او ورسره مل پلاوي په ګډون له اداري فساد سره د مبارزې، د مسوولینو له لوري د مراجعینو او ناروغانو سره ښه چلند، روغتونونو د چاپېریال پاکوالي او نظافت ته پاملرنه، په ښه ډول د مسوولیتونو تر سره کولو او حاضرۍ پابندۍ په اړه د عامه پوهاوي پروګرام چې له څو ورځو را هیسې یې په روغتونونو کې دوام درلود پای ته ورسېد.
د عامه پوهاوي په دغه ناسته کې مالي او اداري مرستیال د لوړو زده کړو وزارت محترم وزیر شیخ صاحب مولوي ندا محمد ندیم صاحب هدایتونه د روغتونونو ټولو مسوولینو او کارمندانو ته وړاندې کړل او له هغوی څخه یې وغوښتل چې له اداري فساد سره جدي مبارزه وکړي او له مراجعینو او ناروغانو سره د ښه سلوک او غوره اخلاقو کار واخلي او روغتونونو پاکوالي او نظافت ته پاملرنه وکړي او همدارنګه د هغه خلکو چې درملنې ته اړتیا لري؛ ښه روغتیایي خدمات وړاندې کړي.
له بلې خو د پوهنتون د دعوت او ارشاد آمر مولوي حبیب الله حماد هم د قران کریم او نبوي لارښوونو په رڼا کې ګډونوالو ته د ناروغانو د درملنې او خدمت کولو د مسوولیتونو په اړه هر اړخیزې خبرې وکړې او هغوی یې تقوا، ښه نیت، نېکۍ ته د را بلنې او له بدو چارو څخه د منع کولو په برخه کې وهڅول.
د علي آباد تدریسي روغتون د عمومي جراحي ډيپارټمنټ شف پوهاند دوکتور عصمت الله سجاد د عامه پوهاوي په دغه غونډه کې د ډاکټرانو په استازیتوب خبرې وکړې او د دغه ډول پروګرامونو جوړول یې مهم وګڼل او ډاډ یې ورکړ چې د یادو شویو ټکو په عملي کولو کې به اقدامات تر سره کړي.
د یادولو وړ ده چې د کابل طبي علومو پوهنتون هڅه کوي تر څو د روغتونونو د روغتیایي او اداري چارو د ښه والي لپاره د عامه پوهاوي ډا ډول پروګرامونه زیات کړي.
