د کابل طبي علومو پوهنتون «ابو علي ابن سينا» اړوند د عليآباد تدريسي روغتون نرسانو د علمي او مسلکي ظرفيت لوړولو په موخه شپږ ورځنی روزنيز سمينار، د دغه روغتون د رهبرۍ او پوهنتون استادانو په حضور سره په رسمي ډول پيل شو.
ياد سمينار د نرسانو روزنيزو اړتياوو په پام کې نيولو سره تنظيم شوی او د روغتيا اړوند اړین او عملي موضوعات لکه د عفونت کنټرول (IP)، د زړه او سږو بيا راژوندي کول (ACLS)، د درملو او خوړو محاسبه، د زخمونو ساتنه او درملنه، د شاک مديريت، او د مصؤنو تزريقاتو تطبيق پکې شامل دي.
د يادونې وړ ده چې دغه روزنيز سمينار به د روغتون ټولو نرسانو (ښځینه او نارینه) لپاره په جلا توګه او په بېلابېلو وختونو کې ترسره شي، څو د پراخ ګډون زمينه برابره او په يو وخت کې د اغېزمنو روغتيايي خدمتونو وړاندې کول ممکن شي.
