د لوړو زده کړو قدرمن وزیر شیخ الحدیث مولوي نداء محمد ندیم صاحب د کابل طبي علومو پوهنتون او اړوندو تدریسي روغتونونو استادانو او اداري کارمندانو لپاره د اصلاحي-علمي سیمینار په درېیمه ورځ ګډون او خپله وینا وکړه.
د لوړو زده کړو وزیر صاحب د دغه سیمنار د اهمیت، د اسلام له نظره د انسان کرامت او علم په اړه هر اړخیزې خبرې وکړې چې دغه ډول دیني سیمینارونه د زده کړې، پوهاوي او ایمان د لاځواکمنتیا لپاره مهمه لار ده. هغه د خپلو خبرو په دوام کې د علم او ټولنې پرمختګ لپاره د علم پر اهمیت ټينګار وکړ او زیاته یې کړه چې علم او پوهه د هېواد د پرمختګ وسیله ده او باید عصري او دیني علومو ته ځانګړې توجه وشي.
وروسته بیا شیخ خان محمد منصور صاحب د شریعت په رڼا کې په فردي او ټولنیز ژوند کې د تعصب زیانونو په اړه د معلومات وړاندې کړل. په پای کې د کابل طبي علومو پوهنتون د مالي او اداري چارو مرستیال مولوي عبدالرحمن مرحوم د دغه سیمینار موخې او اهمیت په اړه وضاحت ورکړ او له ټولو ګډونوالو څخه یې غوښتنه وکړه چې په سیمینار کې وړاندې شوي موضوعات او دیني مسایل په خپل ورځني ژوند او چارو کې عملي کړي.
د یادولو وړ ده چې یاد سیمینار د کابل طبي علومو پوهنتون او تدریسي روغتونونو استادانو او اداري کارمندانو د دیني پوهې لوړولو، دیني مسایلو سره د بلدتیا او دنیوي او اخروي ګټو ترلاسه کولو په موخه جوړ شوی و چې د تصدیق پاڼو په وېشلو سره پای ته ورسېد.
