کابل طبي پوهنتون کې محصلینو ته د شرعي لار ښوونو په موخه غونډه تر سره شوه !

سه شنبه 17 ـ کب ـ 1400

دغه غونډه چې د کابل طبي علومو پوهنتون کې جوړه شوې وه ، د پوهنتون مالي او اداري مرستیال انجنیر عظیم الله کامران اخندزاده، د لوړو زده کړو وزارت د امر بالمعروف او نهی عن المنکر رییس مولوي شاکرالله وحدت، د پوهنتون  استادانو، کارکوونکو او محصلینو په کې برخه اخیستې وه.

ښاغلي مولوي شاکرالله وحدت د لوړو زده کړو وزارت د امر بالمعروف او نهی عن المنکر رییس، له محصلینو سره،  ګڼ شمیر اسلامي لارښونې شریکې کړې؛

نوموړي د اسلام د مبين دين له نظره په ټولنه کې د ټولو علومو، په ځانګړې ډول د طب علم  د ارزښت او اهميت په اړه خبرې وکړې او ویې ویل: د ا.ا.ا موخه په هیواد کې  د طب برخې ته  ځانګړې پاملرنه او د هغې کیفیت لوړول دي او هڅه کوي چې د اسلامي ارزښتونو سره سم ډاکټران او روزل شوي متخصصین ټولنې ته وړاندې کړي، تر څو  زموږ هېواد په روغتيايي برخه کې پر ځان بسيا شي.

مولوي وحدت په هیواد کې په یووالي، اخوت او د تعصب او توکم پالنې په له منځه وړلو باندې ټینګار وکړ او ډاډ یې ورکړ چې  په ا.ا.ا کې د ټولو حقوق یو ډول او خوندي دي.