په مناسبه توګه د بودیجې مصرفولو او د قیقې نیازمندۍ په اړه د مالي او اداري معاونیت غونډه ترسره شوه
د کابل طبي علومو پوهنتون مالي او اداري مرستیال مولوي عبد الرحمن مرحوم په مشرۍ نن سه شنبه د ۱۴۰۳ هـ ش کال د غبرګولي میاشتې پر لومړۍ نېټه د پوهنتون د مالي څانګو او اړونده روغتونونو ځینو مسولینو سره په سمه توګه د بودیجې د مصرف په موخه فوق العاده غونډه وشوه.
په دغه غونډه کې لومړی مالي او اداري مرستیال د بودیجې د مصرف او له اسراف څخه د مخنیوي په موخه خبرې وکړې او ویې ویل چې د پوهنتون لپاره ځانګړې شوې بودیجه باید په مناسه توګه او له اړتیا سم مصرف شي، څو له زیاتو او بې ځایه لګښتونو مخنیوی وشي.
مالي او اداري مرستیال زیاته کړه: "موږ د یو مناسب او معیاري اکاډمیک چاپېریال برابرولو لپاره کار کوو او باید لومړیتوبونه په پام کې ونیسو، څو بودیجه په سمه توګه ولګول شي او اسرف پکې و نه شي."
همدا رنګه د غونډې په بهیر کې د اجنډا اړوند د پوهنتون او تدریسي روغتونونو د یو لړ مهمو اداري مسایلو په اړه تر نظریاتو او بحث وروسته لازمې پرېکړې تر سره شوې.
