علي اباد تدریسي روغتون کې د رادیولوژي نړیواله ورځ ولمانځل شوه
هغه مراسم چې په همدې موخه د کابل طبي علومو پوهنتون په علي اباد تدریسي روغتون کې جوړ شوي وو، د پوهنتون د علمي چارو سرپرست مرستیال پوهاند دوکتور نجیب الله امرخیل سربیره د دغه روغتون رییس، د بېلابېلو ډيپارټمنټونو مسؤولینو او متخصصینو پکې برخه لرله.
د علي آباد تدریسي روغتون رئيس ډاکټر عبدالمطلب شینواري له ګډونوالو او میلمنو څخه د مننې ترڅنګ په روغتون کې د رادیولوژي څانګې د تجهیز او خدماتو په اړه څرکندونې وکړې او زیاته یې کړه: چې د علي آباد تدریسي روغتون د هرې څانګې د تجهیز او په ځانګړي ډول د سرطان شعایي درملنې مرکز د ودانۍ د جوړولو او بیارغنیزو چارو د پیل او پرمختګ په برخه کې پوره هڅې روانې دي.
ورپسې د کابل طبي علومو پوهنتون علمي مرستیال پوهاند دوکتور نجیب الله امرخېل د روغتیایي خدمتونو وړاندې کولو په برخو کې د وروسته پاتې کېدو لاملونه په هېواد کې د جګړو اغیز یاد کړ او زیاته یې کړه چې بیا هم د هېواد او سیمې په کچه زیات روغتیایي خدمات تر سره کیږي او په بېلا بېلو برخو کې متخصصین او مسلکي کسان موجود دي. هغه وویل په روغتونونو کې د پخوانیو ابتدایي وسایلو او تجهیزاتو څخه په ګټه اخیستنې د نورو هېوادونو په څېر روغتیایي خدمات وړاندې کېږي.
د علي آباد تدریسي روغتون د اعصابو جراحي متخصص پوهاند دوکتور احمد فواد پيرزاد د رادیولوژي په برخه کې د پرمختګونو، علمي آثارو د تألیف او د دغې برخې په اړه د عامه پوهاوي پروګرامونو جوړېدو په اړه خبرې وکړې.
د غونډې په دوام د علي اباد تدریسي روغتون د آنکولوژي څانګې آمر ډاکټر عبدالمنان باوري د رادیولوژي څانګې د ارزښت په اړه وویل: چې دغه څانګه د سرطاني ناروغیو د تشخیص او درملنې لپاره مهمه ده ښاغلي باوري په دغه برخه کې د علي اباد تدریسي روغتون د نویو عصري طبي وسایلو، لاسته راوړنو او روغتیایي خدمتونو وړاندې کولو برخه کې بشپړ معلومات وړاندې کړل.
همد راز د غونډې په پاي کې د غضنفر انسټېټیوټ استاد احمد شاه د رادیولوژي په څانګه کې د لېسانس پروګرام د پیل او د روغتونونو تر منځ د همکارۍ په اړه بحث وکړ او له مسؤولینو یې په دغه برخه کې د توجه غوښتنه وکړه.
غونډه د کابل طبي علومو پوهنتون د اړیکو او عامه پوهاوي آمر استاد صبغت الله سجاد لخوا په دعا ویلو پای ته ورسېده
