د کابل طبي علومو پوهنتون علمي کادر غړي په ۱۴۰۳ هـ.ش کال کې د ۱۴ ټوکه کتابونو تألیف او د ۸ عنوانه کتابونو په ژباړه بریالي شوي دي. دغه آثار اوس د محصلانو د لاسرسي وړ دي او په پراخه کچه د پوهنتون په روزنیز چاپېریال کې ترې ګټه اخیستل کېږي.
یاد علمي آثار د پوهنتون د څېړنو او نشراتو کمېټو په منظمو غونډو کې د دغه کمېټې د غړیو په حضور د څېړنیزو او نشراتي اصولو له مخې مطالعه او ارزول شوي او په اړه یې لازمې پرېکړې نیول شوې دي.
دغه کتابونه د محصلانو د علمي کچې لوړوالي او په ملي ژبو د درسي سرچینو بډاینې په موخه ترتیب شوي دي. دا هڅې په هېواد کې د روزنیز او څېړنیز کیفیت د ښه والي لپاره د کابل طبي علومو پوهنتون د علمي کادر غړیو د ژمنتیا څرګندونه کوي.
