د کابل طبي علومو پوهنتون د مسلکي بستونو آزموینه د آزادې سیالۍ له لارې واخیستل شوه
د کابل طبي علومو پوهنتون اړوند تدریسي روغتونونو ۷۳ مسلکي بستونه څه موده وړاندې اعلان ته سپارل شوي وو، آزموینه یې د آزادې سیالۍ له لارې په داسې حال کې چې له ۱۵۰۰ څخه زیاتو کسانو پکې ګډون کړی و په شفاف ډول تر سره شوه.
دغه آزموینه د کابل طبي علومو پوهنتون رهبري هیئت یو شمېر غړیو په حضور کې واخیستل شوه چې د یادې آزموینې په پرانیسته کې د پوهنتون مالي او اداري چارو مرستیال مولوي عبدالرحمن مرحوم ګډونوالو ته ډاډ ور کړ چې په یاده پروسه کې بشپړ شفافیت مراعات شوی دی او هغه کسان چې لوړې نمرې تر لاسه کړي په اړوندو برخو کې به په دنده وګومارل شي.
له بلې خوا هغه نوماندانو چې په دغه سیالۍ کې یې ګډون کړی و د آزموینې بهیر له شفافیت څخه خوښي څرګنده کړه او له مسوولینو یې وغوښتل تر څو حق وړ کسانو ته وسپارل شي.
په همدې حال کې د کابل طبي علومو پوهنتون د آزموینې پارچو له کتنې وروسته هغه کسان چې لوړې نمرې یې تر لاسه کړې وي په اړوندو بستونو کې استخدام کوي.
د یادونې وړ ده چې دغه پوهنتون هڅه کوي تر څو د خلکو لپاره د روغتیایي خدماتو وړاندې کولو لپاره د روغتونونو په مختلفو برخو کې ژمن او مسلکي کسان وګوماري.
