په میوند تدریسي روغتون کې د یو باب مسجد د جوړولو له چارو څخه څارنه وشوه.
د کابل طبي علومو پوهنتون اړوند په میوند تدریسي روغتون کې د یوه جومات د جوړولو چارې چې شپږ میاشتې مخکې د یوه ملي سوداګر لخوا د ۱۰ میلیونه افغانیو په لګښت پیل شوې دي، ۷۰ سلنه بشپړې او پاتې چارې یې روانې دي.
د پوهنتون د مالي او اداري چارو مرستیال ښاغلي مولوي عبدالرحمن مرحوم په مشرۍ ټاکل شوي پلاوي د ۱۴۴۴ هـ ق کال د شوال المکرم میاشتې پر ۲۸ نېټه د دغه جومات د جوړولو له چارو څخه د څارنې پرمهال د یاد جومات د پرمختګ څخه د قدرداني تر څنګ د دغه جومات د ودانیزو چارو د معیاري کولو په اړه مسوولینو ته لازمې لارښوونې وکړې.
یاد مسجد به په دوو پوړونو کې هم مهاله د ۳۰۰ لمونځ کوونکیو ظرفیت ولري او د ټولو آسانتياوو په لرلو سره به د روغتون کارکوونکیو او هېوادوالو لپاره په نژدې راتلونکي کې ګټې اخیستنې ته چمتو شي.
د یادونې وړ ده، چې یاد پلاوي د شهر آرا نسایي ولادي روغتون او د پوهنتون له یو شمېر آمریتونو څخه لیدنه وکړه او کارکوونکیو ته یې په چارو کې د اخلاص او ښه خدمت کولو لازمې سپارښتنې وکړې.
