د کابل ابوعلي ابنسینا طبي علومو پوهنتون کې د تغذي برخې یو کلن فوق دیپلوم اختتامیه غونډې دایرول
دا غونډه د ۱۳۹۸ لمریز کال د لیندۍ میاشتې په ۲۷مه نېټه چهارشنبې ورځ د کابل ابوعلي ابن سینا طبي علومو پوهنتون د علمي کنفرانسونو په عمومي تالار کې دایره شوه. په دې غونډه کې د لوړو زدهکړو وزارت مالي او اداري معیین ښاغلي ډاکتر احمد سیر مهجور او د بېلابېلو برخو رئیسانو، د کابل طبي علومو پوهنتون رئیس ښاغلي پوهاند ډاکتر وحیدالله مومند، د یاد پوهنتون رهبري پلاوي، د افغانستان د طبي شورا عمومي رئیسې آغلې ډاکترې نسرین اوریاخېل، د عامې روغتیا وزارت د ناروغیو د کنترول او وقایې برخې عمومي رئیس ښاغلي احمد حمید، د اروپایي ټولنې استازي، د کانسل سانته مؤسسې رهبري پلاوي او یو شمېر نورو استادانو، مشرانو او ځوانانو ګډون کړی وو.
غونډه د قرانکریم څو مبارکو آیاتو په تلاوت سره پیل شوه. بیا د لوړو زدهکړو وزارت مالي او اداري معیین ښاغلي احمد سیر مهجور د یادې غونډې له دایروونکو او مالي ملاتړ کوونکو په منننې سره وویل، چې د دې ډول غونډو دایرول د تغذي زدهکړو په برخه کې د استادانو او د دې برخې د مینه والو د پوهې لوړاوي په برخه کې ډېرې ګټورې وي، هغه د تغذي په هکله د معلوماتو تر لاسه کول د ټولو لپاره اړین او لازم وبلل. د لوړو زدهکړو وزارت مالي او اداري معیین د دې پروګرام له استادانو او فارغینو وغوښتل چې د تغذي په هکله د څېړنو په ترسره کولو سره په دې برخه کې د موجوده ستونزو د حل په برخه کې مرسته وکړي.
د کابل طبي علومو پوهنتون علمي معاون ښاغلي پوهاند ډاکتر نجیب الله امرخېل د یادې موضوع په هکله هر اړخیزې خبرې وکړې او په بریالیتوب سره د تغذي فوق دیپلوم یو کلن پروګرام ترسره کېدل یې د پوهنتون او افغاني ټولنې لپاره یوه لویه لاسته راوړنه وبلله. د یاد پوهنتون علمي معاون د لوړو زدهکړو او عامې روغتیا وزارتونو له لوري په تشکیل کې د یو نوي سکشن د رامنځته کېدو غوښتنه وکړه، چې د تغذي پروګرام فارغینو ته کاري زمینه برابره شي.
بیا د افغانستان د طبي شورا عمومي رئیسې آغلې ډاکتر نسرین اوریاخېل د تغذيې موضوع د اهمیت په هکله د ناپوهۍ او بېخبرۍ موضوع ته په اشارې سره وویل، چې یوازې فقر او غربت د انسانانو ترمنځ د سؤتغذي لامل نه کېږي؛ بلکې د خلکو ناپوهي او بېخبري هم د سؤتغذي لاملېږي. د افغانستان د طبي شورا رئیس له اړوندو ادارو وغوښتل چې د تغذي موضوع د خپلو کاري پروګرامونو په لومړیتوب کې راولي.
تر هغې وروسته د عامې روغتیا وزارت د ناروغیو کنترول او وقایې برخې عمومي رییس ښاغلي ډاکتر حمید په بریالیتوب سره د دې پروګرام ختمېدلو مبارکي یې کابل طبی علومو پوهنتون ته ورکړه او د تغذي په اړه یې په مفصل ډول خبرې وکړې. هغه همدارنګه د تغذي پروګرام د عامې روغتیا وزارت یو لومړیتوب وباله او د دې ډول پروګرامونو په دوام او پراخوالي یې ټینګار وکړ.
د یادونې ده، چې دا پروګرام د ۲۰۱۹ میلادي کال د می میاشتې له ۱۸ نېټې راهیسې د اروپایي ټولنې او کانسل سانته مؤسسې په مالي مرسته د کابل ابو علي ابن سینا طبي علومو پوهنتون کې دایر شوی و. همدارنګه په پام کې ده، چې د یاد پروګرام دویم پړاو په نږدې راتلونکي کې پیل شي.
