د کابل طبي علومو پوهنتون «ابوعلي ابن سینا» اړودند نرسنګ پوهنځي یو شمېر محصلانو د عملې کچې لوړوالي، له کاري چاپېریال، طبي تجهیزاتو او روغتیايي خدماتو وړاندې کېدو سره د بلدتیا په موخه د پولیسو ۳۰۰ بستریز تخصصي او ملي روغتون څخه لیدنه وکړه.
دغه لیدنه چې د کابل طبي علومو پوهنتون او یاد روغتون د ادارې په همغږۍ ترسره شوه؛ محصلانو ته یې دا زمینه برابره کړه تر څو د روغتون له بېلابېلو برخو لکه د جراحي خونې، د ځانګړې څارنې برخې، لابراتوارونو او پرمختللیو طبي وسایلو او تجهیزاتو سره بلدتیا ترلاسه کړي. همدارنګه د پوهنتون محصلان پدې وتوانېدل چې د روغتون له روغتیايي پرسونل سره بحث او خبرې وکړي او د هغوی د کاري تجربو په اړه معلومات ترلاسه کړي.
