ستوماتولوژي تدریسي روغتون په جراحي عملیات سره د "دنتیجروس" لوی سیسټ په بریالیتوب سره لرې کړ
د کابل طبي علومو پوهنتون اړوند په ستوماتولوژي تدریسي روغتون کې د "دنتیجروس" لوی سیسټ د خولې زامې جراحی ډیپارټمنټ د متخصصینو او ډاکټرانو لخوا د یو جراحي عملیات په ترڅ کې د ټول اناتوميک جوړښت او اعصاب په ساتلو سره د عمومي انستیزی په حالت کې په بریالیتوب سره وویستل شو.
د زامې جراحي متخصص پوهنیار ډاکټر عبدالغفور صدیقی وویل، دغه ناروغ چې ۲۰ کاله عمر لري او روغتون ته راغلی و، تر اړینو معایناتو وروسته یې جراحي عملیات تر سره او په بریالیتوب سره یې د زامې اخته برخه لرې شوه. همدارنګه د دوو "ریکانسترکشن" پلېټونو په مرستې سره یې د خولې د ژوولو او ښکلا برخه بېرته فعاله شوه .
ډاکټر صديقي د ناروغ روغتيايي حالت د ډاډ وړ وباله او زياته يې کړه، چې روغتيايي حالت يې مخ په ښه کېدو دى او له لازمو سپارښتنو وروسته به له روغتون څخه رخصت شي.
دا په داسې حال کې ده چې د دغه روغتون د خولې زامې جراحي څانګه له نږدې یو کال راهیسې د زامې جراحي عملیاتونه ترسره کوي او تر دې دمه یې بېلابېل بریالي عملیاتونه ترسره کړي.
