سید رسول منګل د میوند تدریسي روغتون رئيس په توګه معرفي او په کار یې پیل وکړ
دوکتور سید رسول منګل په میوند تدریسي روغتون کې د هغه جوړو شویو مراسمو په ترڅ کې چې د لوړو زده کړو وزارت د بشري سرچینو رئيس مفتی عبدالکریم امیری، د کابل طبي علومو پوهنتون رئيس دوکتور مفتي اسدالله نجات او رهبري هیئت یو شمېر غړیو هم حضور درلود، د دغه روغتون ډاکټرانو، استادانو او کارمندانو ته د روغتون د رئيس په توګه معرفي شو.
د کابل طبي علومو پوهنتون رئيس د خپلو خبرو تر څنګ د طبابت څانګې د سپېڅلتیا په اړه خبرې وکړې او ویې ویل چې تغییر او بدلون په ادارو کې د چارو د ښه والي په موخه تر سره کېږي څو یوه اداره څرنګه چې لازمه ده کنټرول او رهبري شي، نوموړي د روغتون له ستونزو یادونه وکړه او له نوي رئيس او ټولو ډاکټرانو څخه یې وغوښتل څو د دغه روغتون تدریسي او روغتیایي خدمات په هر اړخیزې همکارۍ سره ښه همغږي او رهبري کړي.
د لوړو زده کړو وزارت د بشري سرچینو رئيس مفتي عبدالکریم امیري د میوند تدریسي روغتون رئيس د ګومارنې مکتوب ولوستلو او ویې ویل، په ادارو کې تغییر او تبدیل یو اصل دی او کار باید اهل کار ته وسپارل شي، نوموړي زیاته کړه چې تر اوسه هم زموږ زیات شمېر هېواد وال د درملنې لپاره بهر هېوادونو ته ځي چې د مخنیوي لپاره یې د روغتیایي خدماتو وړاندې کولو په برخه کې د خلکو باور تر لاسه کولو لپاره باید جدي پاملرنه وشي.
د میوند تدریسي روغتون نوي رئیس د خپلو پروګرامونو په اړه خبرې وکړې، ویې ویل چې په اداره کې اصلاحات او تغییرات د یو شخص په وسیله نه رامنځته کېږي، باید له یو له بل سره همکاري وکړو څو په روغتونونو کې د تدریس او روغتیایي خدماتو وړاندې کولو کچه لوړه کړو او د دغه روغتون په مختلفو برخو کې معیاري پرمختللي او معیاري عملیاتونه تر سره کړو. ډاکټر منګل زیاته کړه چې روغتیا د خلکو اړتیا ده او موږ باید کادرونه په ښه ډول وروزو تر څو د هېواد راتلونکي نسل ته څرنګه چې تمه لري روغتیایي خدمات وړاندې کړو.
د یادولو وړ ده چې دوکتور سید رسول منګل تر دې وړاندې د عامې روغتیا وزارت د اقتصاد رئیس او روغتیایي قوانینو عملي کولو د بررسۍ رئیس په توګه دنده تر سره کړې ده.
