په میوند تدریسي روغتون کې یو باب مسجد او دوه نورې پروژې ګټه اخیستنې ته وسپارل شوې
د کابل طبي علومو پوهنتون اړوند په میوند تدریسي روغتون کې د برېښنا پروژه، د پوستکي(جلدي) وارډ او یو باب جومات پروژې بشپړې او د لوړو زده کړو وزارت د سرپرست وزیر شیخ الحدیث مولوي نداء محمد ندیم له لوري په داسې حال کې چې د کابل طبي علومو پوهنتون رهبرۍ او یو شمېر استادانو او کارمندانو هم حضور درلود، د یو لړ مراسمو په ترڅ کې پرانیستل شوې او ګټه اخیستنې ته وسپارل شوې.
په دغه مراسمو کې د لوړو زده کړو سرپرست وزیر شیخ الحدیث مولوي نداء محمد ندیم د کابل طبي علومو پوهنتون اړوند د روغتیایي مراکزو له پراختیا او پرمختګ څخه خوښي څرګنده کړه او ویې ویل:
روغتیایي خدمات د اسلامي نظام له لومړیتوبونو څخه دي او داچې د هېواد روغتیایي برخه د پرمختګ لوري ته ځي، اسلامي نظام یې د پرمختګ او ترقۍ لپاره هر ډول همکارۍ ته ژمن دی.
له بلې خوا د کابل طبي علومو پوهنتون رئيس دوکتور مفتي اسدالله نجات وویل: کابل طبي علومو پوهنتون هڅه کوي تر څو په تدریسي روغتونونو کې د روغتیایي خدماتو وړاندې کولو په برخه کې آسانتیاوې رامنځته کړي.
په دغه مراسمو کې د میوند تدریسي روغتون رئيس ډاکټر نورستان شینواري د دغه پروژو په اړه معلومات وړاندې کړل او ویې ویل یاد روغتون له ډېرې مودې راهیسې د برېښنا په برخه کې له ستونزو سره مخ وو، چې د یادې پروژې په بشپړېدو سره به د روغتون برېښنا په دایمي ډول تأمین شي او پوستکي(جلدي) وارډ چې د وسایلو او تجهیزاتو له کمبود سره مخ و، په عصري طبي وسایلو سمبال او وروسته له دې به د پوستکي مختلفو ناروغیو درملنه پکې کېږي.
نوموړي زیاته کړه چې په دغه روغتون کې یو باب جومات د یو تن مخلص هېوادوال له لوري د (٩)میلونه افغانیو په ارزښت په دوه پوړونو کې چې په یو وخت کې د ٧٠٠ لمونځ کوونکو ظرفیت به ولري، په اساسي ډول جوړ او بشپړ شو.
باید یادونه وشي چې دغه پروژې په داسې حال کې پرانیستل کېږي چې د تېرو کلونو په پرتله په میوند تدریسي روغتون کې د ناروغانو لپاره زیاتې آسانتیاوې رامنځته شوي دي او د ډاکټرانو لخوا ښه روغتیایي خدمات وړاندې او مختلف عملیاتونه په بریالي ډول تر سره کېږي.
